“HALKYŇ ARKADAGLY ZAMANASY” – ÝÜREKLERIŇ OWAZASY
2021-nji ýylyň 6-njy dekabrynda Türkmenistanyň Daşary işler ministrliginiň Halkara gatnaşyklary institutynda 2022-nji ýyly “Halkyň Arkadagly zamanasy” diýlip atlandyrylmagy mynasybetli maslahat geçirildi. Maslahata Türkmenistanyň Milli Geňeşiniň Halk Maslahatynyň we Türkmenistanyň Milli Geňeşiniň Mejlisiniň deputatlary, Türkmenistanyň Demokratik partiýasynyň, Türkmenistanyň Magtymguly adyndaky Ýaşlar guramasynyň Merkezi Geňeşiniň wekilleri gatnaşdylar.
Maslahatda çykyş edenler 2022-nji ýylyň mynasyp atlandyrylandygy, şunuň bilen baglylykda, Türkmenistanda 2022-nji ýyly «Halkyň Arkadagly zamanasy» diýip atlandyrylmak baradaky teklibiň halkymyzyň arasynda giňden goldaw tapandygy barada gürrüň etdiler.
Çünki ata Watanymyzda gazanylan her bir belent sepgitleriň gözbaşynda dünýäde ykrar edilen döwlet Baştutanymyzyň goldaw-hemaýatlary, irginsiz zähmeti, döwrüň badyna tizlik berýän başlangyçlary, jöwher parasady durandyr. Olaryň özen-sütüniniň watansöýüjilikden hem ynsanperwerlikden gözbaş alýandygyny halkymyz her bir ädimde görüp, duýup, bu belent hakykatdan ruhy güýç alyp ýaşaýar. Bu ruhubelentlik syýasy, ykdysady, medeni-durmuş ulgamlarynda gazanylýan taryhy ýeňişlere-de egsilmez güýç bolup goşulýar. Hormatly Prezidentimiziň ýurdumyz, il-ulsumyz, umuman, tutuş adamzat üçin edýän bimöçber aladalary halkymyzyň Milli Lideriniň daşynda has-da jebisleşdirýär diýip, çykyş edenleriň her biri uly buýsanç bilen bellediler.
Maslahata gatnaşyjylar geljek 2022-nji ýyly «Halkyň Arkadagly zamanasy» diýip atlandyrmak baradaky teklibi tüýs ýürekden goldaýandyklaryny biragyzdan beýan edip, ösüşleriň we özgerişleriň ýoly bilen ynamly öňe barýan berkarar Watanymyzyň mundan beýläk hem gülläp ösmeginiň, at-abraýynyň dünýä dolmagynyň hatyrasyna yhlaslaryny, zähmetlerini, başarnyklaryny gaýgyrmajakdyklaryna ynandyrdylar.
Ýurdumyzy ösüşiň täze belent derejelerine çykarýan, eziz Diýarymyzyň dünýädäki abraý-mertebesini ýokarlandyrýan, ýaşlara ählitaraplaýyn görelde bolýan hormatly Prezidentimiziň janynyň sag, başynyň belent, beýik işleriniň hemişe rowaç bolmagyny arzuw etdiler.
Aýna BAÝMURADOWA,
Türkmenistanyň Daşary işler ministrliginiň
Halkara gatnaşyklary institutynyň uly mugallymy.