Halkara ylym we parahatçylyk hepdeligi
Gahryman Arkadagymyzyň başlangyçlary esasynda ýola goýlan we Arkadagly Serdarymyz tarapyndan üstünlikli dowam etdirilýän işler, esasan-da ýurdumyzyň daşary syýasaty täze derejelere eýe bolýar. Türkmenistan BMG-niň belent münberinden halkara derejesinde uly ähmiýete eýe bolan birnäçe başlangyçlary, şol sanda dünýäde we sebitde parahatçylygyň we howpsuzlygyň üpjün edilmegine, ýurtlaryň halklarynyň hemişe abadan we dostlukly ýaşamagyna gönükdirilen başlangyçlaryny öňe sürýär hem-de şol başlangyçlar giň goldawa eýe bolýar.
“Halkara ylym we parahatçylyk hepdeligi” diýen asylly başlangyç hem munuň subutnamasydyr. Ýeri gelende belläp geçsek, bu hepdelik ilkinji gezek 1986-njy ýylda “Halkara parahatçylyk ýylyny” bellemegiň çäklerinde geçirildi. Ol hökümete degişli bolmadyk başlangyç hökmünde geçirilip, onuň dowamynda dürli ugurdaş çäreler guraldy. 1986-njy ýyldaky dabaranyň üstünliklerine esaslanyp, guraýjylar bu ugurda tagallalaryny yzygiderli dowam etdiler. Her ýyl guraljak dabaranyň ähmiýetini göz öňünde tutup, BMG-niň Baş Assambleýasy tarapyndan 1988-nji ýylyň dekabrynda her ýyl 10-njy noýabryň düşýän hepdesinde “Halkara ylym we parahatçylyk hepdeliginiň” geçirilmegini yglan edýän 43/61 karary kabul edildi. Baş Assambleýa BMG agza döwletleri, halkara guramalary, dürli ugurda zähmet çekýän bilermenleri, okuwçylary, talyplary ylmyň we tehnologiýanyň ösüşi, parahatçylygy we howpsuzlygy üpjün etmegiň arabaglanyşyklar hakyndaky maglumatlary öwrenmek hem-de ýaýratmak ugrunda geçiriljek çärelere hemaýat bermäge, şeýle hem alymlaryň arasynda halkara hyzmatdaşlygyny we ylmy ösdürmäge çagyrýar.
Ata Watanymyz Türkmenistanyň BMG-niň bu ýöriteleşdirilen edarasy bilen alyp barýan ýakyn we işjeň hyzmatdaşlygyny nazara alanyňda, ýurdumyzda bu ugurda çärelerdir, dabaralar geçirilýär. Çünki Garaşsyz, baky Bitarap Türkmenistanda hormatly Prezidentimiziň alyp barýan daşary we içeri syýasatlarynyň düýp mazmuny hem şol asylly we ynsanperwer maksatlary – ösüş arkaly parahatçylygy gazanmak maksadyny özünde jemleýär.
Selbi NAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä
dilleri kafedrasynyň mugallymy.