HALKARA YLMY-AMALY MASLAHAT GEÇIRILDI
2025-nji ýylyň 6-njy noýabrynda Türkmenistanyň Daşary işler ministrliginiň Halkara gatnaşyklary institutynda S.A. Nyýazow adyndaky Türkmen oba hojalyk uniwersitetiniň guramagynda Hasyl toýy mynasybetli “Agrosenagat toplumynyň durnukly ösüşi” atly onlaýn halkara ylmy-amaly maslahat geçirildi. Sanly ulgam arkaly geçirilen maslahata ýurdumyzyň ýokary okuw mekdepleriniň professor-mugallymlary we talyp ýaşlary gatnaşdylar.
Maslahatyň dowamynda çykyş edenler oba hojalyk önümçiliginde dünýä tejribesinden peýdalanmagyň ähmiýeti, ýaşlaryň bu ugurda ylmy gözleglere çekilmegi we täze pikirleriň iş ýüzünde durmuşa geçirilmegi barada giňişleýin gürrüň berdiler. Şeýle-de oba hojalyk ulgamynyň häzirki döwürde ösdürilişi, önümçiligiň netijeliligini ýokarlandyrmak, ekologiýa howpsuzlygyny üpjün etmek, innowasion tehnologiýalary önümçilige ornaşdyrmak we agrosenagat toplumynyň durnukly ösüşini gazanmagyň meselelerini ara alyp maslahatlaşdylar.
Täsirli geçen maslahat mugallymlaryň hünär kämilligini ýokarlandyrmaga, ýaş nesliň ylmy işleri bilen gyzyklanmagyny artdyrmaga we ýurdumyzyň agrosenagat ulgamynyň ösüşine goşant goşmaga ýardam etdi.
Arzuw MELÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.