HALKARA TERJIME GÜNI MYNASYBETLI BÄSLEŞIK
2025-nji ýylyň 15-nji oktýabrynda Türkmenistanyň Daşary işler ministrliginiň Halkara gatnaşyklary institutynda Halkara terjime güni mynasybetli institutyň ähli fakultetleriniň talyplarynyň arasynda zehin bäsleşigi geçirildi. Bäsleşik iňlis dilinde geçirilip, onda her fakultetden bir topar çykyş etdi. Bäsleşigiň dowamynda toparlar geografiýa, dünýä edebiýaty, frazeologik derňew (iňlis nakyllarynyň türkmen dilindäki deňeşdirmelerini tapmak we manysyny düşündirmek), lingwistik deňlik (iňlis nakyllarynyň türkmen dilindäki deňeşdirmelerini tapmak), diňläp düşünmek (filmlerden böleklere esaslanýan ýumuşlary diňlemek we aýdyp bermek) we terjime başarnyklary ýaly dürli şertler boýunça bäsleşdiler.
Bäsleşigiň esasy maksady talyplaryň daşary ýurt dillerini kämilleşdirmek we terjime etmek endiklerini ýokarlandyrmak, şeýle hem BMG-niň Baş Assambleýasynyň Karary esasynda her ýylyň 30-njy sentýabrynda bellenilýän Halkara terjime gününiň ähmiýetini düşündirmekden ybaratdyr. Şu nukdaýnazardan, dünýä dilleri kafedrasynyň mugallymlaryndan düzülen emin agzalary ýeňijileri yglan etmekde öran adalatly çemeleşdiler. Netijede, I orna Halkara gatnaşyklary fakultetiniň topary, II orna Halkara ykdysady gatnaşyklary fakultetiniň topary, III orna Halkara hukuk fakultetiniň topary we IV orna Halkara žurnalistikasy fakultetiniň topary mynasyp boldular.
Halkara terjime güni her ýylyň 30-njy sentýabrynda bellenilýän hünar baýramçylygydyr. Bu baýramçylyk ilkinji Halkara terjimeçiler Federasiýasy tarapyndan 1991-nji ýylda teklip edildi. 2017-nji ýylda BMG-niň 71-nji mejlisinde Halkara terjime güni baradaky Kararnama ähli agza ýurtlar tarapyndan biragyzdan kabul edildi. Bu Kararnamada terjimeçileriň parahatçylygy üpjün etmekde we halklaryň arasynda özara düşünişmegi ýola goýmakda ägirt uly ähmiýetli ornunyň bardygy aýdyň beýan edilýär.
Bäsleşigiň ahyrynda oňa gatnaşyjylar ýaşlar baradaky aladalary üçin Gahryman Arkadagymyza we Arkadagly Gahryman Serdarymyza öz minnetdarlyklaryny bildirdiler.
Nurgeldi ATAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.