HALKARA SÖWDA WE HYZMATLAR: bilelikde ykdysady durnuklylyga we ösüşe tarap
Täze taryhy döwürde durmuş-ykdysady özgertmeleriň, milli
ykdysadyýetimize bazar gatnaşyklarynyň gurallarynyň we ýörelgeleriniň
ornaşdyrylmagy Diýarymyzyň ykdysady taýdan galkynmagyna getirdi. Munuň özi
işewürligi guramagyň, hyzmatlary hödürlemegiň häzirki zaman usullary ulanylýan
içerki söwdanyň depginli ösüşinde öz beýanyny tapyp, bu babatda halkara
hyzmatdaşlyga aýratyn orun degişlidir. Şu jähetden, 2025-nji ýylyň 29-njy apreli
— 1-nji maýy aralygynda Söwda-senagat edarasynda «Halkara söwda we
hyzmatlar» atly sergi-ýarmarkanyň hem-de «Türkmenistanda halkara ülňülerine
laýyk gelýän hil üpjünçiligi» atly halkara maslahatyň geçirilmegi möhüm
ähmiýete eýe boldy.
2025-nji ýylyň 18-nji aprelinde geçirilen Türkmenistanyň Ministrler
Kabinetiniň mejlisinde habar berlişi ýaly, bu sergä ýurdumyzyň söwda toplumyna
degişli hem-de ugurdaş ministrlikleriň, pudaklaýyn dolandyryş edaralarynyň,
Senagatçylar we telekeçiler birleşmesiniň agzalarynyň, daşary ýurt
kompaniýalarynyň, guramalaryň gatnaşmagy meýilleşdirilýär. Onuň çäklerinde
halkara hünärmenleriň gatnaşmagynda eksporty ösdürmek, sanly marketing,
sertifikasiýa talaplary ýaly meseleler boýunça maslahat beriş duşuşyklarynyň,
işewürlik geňeşmeleriniň geçirilmegi göz öňünde tutulýar. Halkara maslahata
gatnaşmak üçin dünýäniň 27 ýurdundan kompaniýalaryň we guramalaryň 63-si
hasaba alyndy. Şunuň bilen baglylykda, döwlet Baştutanymyz degişli sergä we
halkara foruma gowy derejede taýýarlyk görmegiň wajypdygyna ünsi çekdi hem-
de bu babatda degişli tabşyryklary berdi.
Mälim bolşy ýaly, Türkmenistanyň dünýä ýurtlary bilen söwda-ykdysady
hyzmatdaşlygy barha ösdürilýär. Harytlaryň bäsdeşlige ukyplylygy ýokarlanyp,
ýurdumyzyň içerki bazarynda haryt bolçulygyny berkitmekde, daşary söwdany
giňeltmekde oňat netijeler gazanylýar. «Türkmenistanda öndürilen» nyşanly
harytlar bu gün dünýä bazarlarynda giňden tanalýar we ýokary hili, ygtybarlylygy
bilen tapawutlanýar. Şoňa görä-de, şu gezekki forum ýurdumyzyň ykdysadyýetini
ösdürmekde söwda we hyzmatlar ulgamyna uly ornuň degişlidigini nobatdaky
gezek görkezer.
Gahryman Arkadagymyzyň tagallalary bilen hem-de hormatly
Prezidentimiziň parasatly baştutanlygynda üstünlikli amala aşyrylýan döwlet
maksatnamalarynyň, konsepsiýalaryň we meýilnamalaryň netijesinde, ýurdumyzyň
ykdysadyýeti ýokary depginlerde maýa goýumlar bilen üpjün edilýär. Bazar
gatnaşyklaryny kämilleşdirmekde, ykdysadyýetiň hususy bölegini depginli
ösdürmekde döwlet derejesinde goldawlar berlip, ýokary netijeler gazanylýar.
Şunda «Halkara söwda we hyzmatlar» atly sergi-ýarmarka hem-de
«Türkmenistanda halkara ülňülerine laýyk gelýän hil üpjünçiligi» atly halkara
maslahata gatnaşmaga isleg bildiren taraplaryň arasynda ýurdumyz bilen köp
ýyllaryň dowamynda hyzmatdaşlyk edýän, bilelikdäki maýa goýum
taslamalarynyň durmuşa geçirilmegine işjeň gatnaşýan daşary ýurt
kompaniýalarynyň hem bardygyny nygtamak gerek.
Şeýlelikde, bu forum söwda ulgamynyň ösüşine, harytlaryň elektron
dolanyşygy, döwrebap hyzmatlar ulgamy we beýleki ugurlarda gazanylýan
netijelere, milli ykdysadyýetimiziň ösüşlerine, hususy önüm öndürijilerimiziň
eksport mümkinçiliklerine, halkara hyzmatdaşlykda gazanylanlara baha bermäge
mümkinçilik döreder.
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.