«HALKARA SÖWDÄ WE HYZMATLAR» ATLY SERGI-ÝARMARKASY GEÇIRILÝÄR
2025-nji ýylyň 29-njy aprel — 1-nji maý aralygynda Türkmenistanyň Söwda-senagat edarasynda «Halkara söwda we hyzmatlar» atly sergi-ýarmarkasy we onuň çäklerinde «Türkmenistanda halkara ülňülere laýyk gelýän hil üpjünçiligi» atly halkara maslahat öz işine başlady.
Bu sergä ýurdumyzyň söwda toplumyna degişli hem-de ugurdaş ministrlikler, pudaklaýyn dolandyryş edaralary, Senagatçylar we telekeçiler birleşmesiniň agzalary, daşary ýurt kompaniýalary gatnaşýarlar. Sergi azyk we oba hojalygy, dürli görnüşli harytlar we hyzmatlar, elektron söwda, sarp ediş harytlary, senagat önümleri, senetçilik we döredijilik pudaklaryny öz içine alýan giň ugurlar boýunça geçirilýär. Şeýle-de, bu sergä Türkmenistanyň Daşary işler ministrliginiň Halkara gatnaşyklary institutynyň talyplarynyň gatnaşmagy, ýaşlaryň nazary bilimleriniň kämilleşmegine uly mümkinçilik berýär.
«Halkara söwda we hyzmatlar» atly sergi-ýarmarkasy Türkmenistandan we daşary ýurtlardan öňdebaryjy önüm öndürijileri, eksport-import edijileri birleşdirýän uly ähmiýetli çäreleriň biri bolar.
Şeýlelikde, dünýäde ösen ykdysadyýeti bilen tanalýan Türkmenistanyň paýtagtynda guralan bu sergi-ýarmarkasy ýurdumyzyň önümçilik kuwwatlyklaryny, eksport mümkinçiliklerini artdyrmak boýunça milli taslamalary amala aşyrmakda, Türkmenistany dünýä derejesinde harytlary öndürmekde bäsdeşlige ukyply döwlet hökmünde tanatmakda uly ähmiýete eýedir.
Aýjahan GULHANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň IV ýyl talyby.