Halkara okuw maslahaty geçirildi
2026-njy ýylyň 10-11-nji iýunynda Aşgabat şäherindäki «Arçabil» myhmanhanasynda «BMG-niň Halkara söwda merkeziniň (ITC) «Bütindünýä söwda guramasyna agza bolmagy bilen bagly çärelere gatnaşmak üçin döwlet gullukçylaryň ukyplaryny ýokarlandyrmak» atly taslamanyň çäklerinde «Subsidiýalar we döwlet söwda kärhanalary boýunça BSG-niň düzgünleri» atly okuw maslahaty geçirildi. Bu möhüm çärä Türkmenistanyň maliýe we ykdysadyýet ministrliginiň, Türkmenistanyň Mejlisiniň, Türkmenistanyň Daşky gurşawy goramak ministrliginiň, Türkmenistanyň Saglygy goraýyş we derman senagaty ministrliginiň, «Türkmenstandartlary» baş döwlet gullugynyň tejribeli hünärmenleri hem-de ýurdumyzyň ýokary okuw mekdepleriniň professor mugallymlary gatnaşdylar.
Okuw maslahatynyň esasy maksady Halkara Söwda merkezi tarapyndan Ýewropa Bileleşiginiň goldawy bilen Türkmenistanyň Bütindünýä söwda guramasyna goşulmagyna ýardam bermäge gönükdirilendir. Hususan-da, söwdadaky tehniki bökdençlikleri we täze kanun taslamalaryny halkara ülňülerine laýyk getirmek meseleleri maslahatlaşyldy.
Okuw maslahatynyň dowamynda BSG-niň ylalaşyklarynyň talaplary, döwlet söwda kärhanalarynyň ýerine ýetirýän işleri boýunça içgin öwrenilip birnäçe pikir alyşmalar boldy. Şeýle-de söwdadaky tehniki kadalaşdyrmalar we standartlar, milli ykdysadyýetimiziň halkara söwdasyna integrasiýasy ýaly möhüm temalar boýunça täze bilimleri, tejribeleri özleşdirdiler.
Maslahatyň ahyrynda gyzykly sorag-jogaplar alşyldy. Soňra şeýle möhüm derejede okuw maslahatlary geçirmäge, bilimleri artdyryp täze gözýetimleri giňeltmäge döredip berýän mümkinçilikleri üçin Gahryman Arkadagymyza, Arkadagly Gahryman Serdarymyza hoşallyk sözleri aýdyldy.
Gyzylgül GURBANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy