“Halk hakydasy” ýadygärlikler toplumyna hakyda gezelenji
2021-nji ýylyň 4-nji oktýabrynda Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasy hem-de “Paýhas we parasat” ylmy gurnagy tarapyndan “6-njy oktýabr – Hatyra güni” mynasybetli “Halk hakydasy” ýadygärlikler toplumyna hakyda gezelenji guraldy. Oňa institutymyzyň halypa mugallymlary we talyplary gatnaşdylar.
Hakyda gezelenjiň dowamynda mugallymlar talyp ýaşlara taryhda Türkmenistanyň çäklerinde bolan ähli uruşlaryň dowamynda Watan goragynda wepat bolan gahrymanlarymyz, şeýle-de, 1948-nji ýylyň 6-njy oktýabryndaky Aşgabat ýertitremesinde şehit bolan watandaşlarymyz barada täsirli gürrüň berdiler. Watanymyzyň asudalygy, halkymyzyň agzybirligi ugrunda janyny gurban edip, bizi şeýle eşretli durmuşa ýetiren beýik şahsyýetlerimiziň ýadygärliklerini synlamak, olaryň geçen şöhratly we gahrymançylykly ýollary baradaky gyzykly maglumatlary diňlemek talyp ýaşlarda watansöýüjilik, ruhubelentlik ýaly asylly häsiýetleriň kemala gelmeginde örän möhüm ähmiýete eýe boldy.
Hakyda gezelenjiniň dowamynda Watan gahrymanlarymyzy sarpalamaga we olaryň şöhratly edermenliklerini çuňňur öwrenmäge döredip berýän giň mümkinçilikleri üçin hormatly Prezidentimize çäksiz alkyşlar aýdyldy.
Tawus AKJAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.