GEOGRAFIÝA WE EKOLOGIÝA DERSLERI BOÝUNÇA BÄSLEŞIK GEÇIRILDI
2026-njy ýylyň 30-njy martynda Türkmenistanyň Daşary işler ministrliginiň Halkara gatnaşyklary institutynda Zyňyndysyz dünýä üçin halkara güni mynasybetli institutyň hyzmatdaş orta okuw mekdepleriniň uçurym synp okuwçylarynyň arasynda Geografiýa we Ekologiýa derslerinden bäsleşik geçirildi.
Bäsleşige Aşgabat şäheriniň Annanyýaz Artyk adyndaky daşary ýurt dillerini çuňlaşdyryp öwredýän ýöriteleşdirilen 68-nji orta mekdebiniň, Aşgabat şaheriniň Türkmenistanyň Gahrymany Gurbansoltan eje adyndaky daşary ýurt dillerine ýöriteleşdirilen 72-nji orta mekdebiniň, Aşgabat şäheriniň ynsançylyk ugurly we daşary ýurt dili derslerini çuňlaşdyryp öwredýän ýöriteleşdirilen 76-njy orta mekdebiniň, Aşgabat şäheriniň daşary ýurt dillerini çuňlaşdyryp öwredýän ýöriteleşdirilen 37-nji orta, Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň we Aşgabat şäher häkimliginiň 21-nji ýöriteleşdirilen terbiýeçilik-okuw mekdebiniň uçurym synp okuwçylaryndan ybarat toparlar gatnaşdylar.
Institutyň Halkara gatnaşyklary we diplomatiýa kafedrasy tarapyndan guralan bu bäsleşigiň esasy maksady ýaşlaryň ylym-bilim ukyplaryny açyp görkezmekden, olaryň intellektual we logiki pikirlenişini ösdürmekden hem-de zehinli ýaşlary ýüze çykarmaga gönükdirildi. Bäsleşik üç tapgyrdan ybarat bolup, okuwçylaryň diňe bir nazary bilimlerini däl, eýsem olaryň çalt pikirlenmek ukyplaryny hem synagdan geçirdi. Okuwçylar birinji tapgyrda dünýä döwletleriniň paýtagtlary, ikinji tapgyrda döwlet baýdaklary, üçünji tapgyrda bolsa häzirki zaman ekologiýa meseleleri boýunça 12 soraga, jemi üç tapgyr boýunça 36 sany soraga jogap berdiler. Her soraga jogap bermek üçin wagt bellenilip, jogaplar ýazmaça görnüşde kabul edildi.
Bäsleşigiň netijeleri boýunça, Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň okuwçylar topary iň ýokary netijäni gazanyp, I orna mynasyp boldular. II orny Aşgabat şäher häkimliginiň 21-nji ýöriteleşdirilen terbiýeçilik-okuw mekdebiniň topary, III orny bolsa Aşgabat şäheriniň ynsançylyk ugurly we daşary ýurt dili derslerini çuňlaşdyryp öwredýän ýöriteleşdirilen 76-njy mekdebiniň okuwçylary eýelediler. Ýeňijilere Türkmenistanyň Daşary işler ministrliginiň Halkara gatnaşyklary institutynyň adyndan Diplomlar we ýadygärlik sowgatlary dabaraly ýagdaýda gowşuryldy.
Hudaýberdi ROZYKOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 4-nji ýyl talyby.