GELJEKKI HALKARAÇY ŽURNALISTLER BILEN OKUW SAPAGY GEÇIRILDI
2026-njy ýylyň 12-nji maýynda Türkmenistanyň Daşary işler ministrliginiň Halkara gatnaşyklary institutynda Gruziýanyň Tehniki uniwersitetiniň Halkara gatnaşyklary we hukuk fakultetiniň professory Badri Natçkebia talyp ýaşlar üçin ussatlyk sapagyny geçdi. Professor ussatlyk sapagynyň dowamynda Türkmenistanyň alyp barýan oňyn Bitaraplyk syýasaty, ýurdumyzyň dünýäde parahatçylygy we howpsuzlygy üpjün etmekdäki halkara başlangyçlary barada giňişleýin durup geçdi. Şeýle hem, myhman žurnalistleriň hukuklary we borçlary, köpçülikleýin habar beriş serişdeleri hakyndaky kanunçylygyň kämilleşdirilişi boýunça öz baý tejribesini talyplar bilen paýlaşdy.
Hünärmenler we talyplar üçin guralýan bu görnüşli okuw sapaklary ýaş žurnalistleriň hünär kämilleşmegine uly itergi berýär. Sapagyň ahyrynda talyplar özlerini gyzyklandyrýan sowallar bilen professora ýüzlendiler. Özara gyzgyn pikir alyşmalar we sorag-jogaplar çäräniň täsirliligini has-da artdyrdy.
Şahnoza ÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby