GDA-NYŇ ÝAŞ HALKARAÇYLARYNYŇ A.A.GROMYKO ADYNDAKY BÄSLEŞIGINIŇ JEMLERI JEMLENDI
2018-nji ýyldan bäri her ýyl geçirilýän GDA-nyň ýaş halkaraçylarynyň A.A.Gromyko adyndaky bäsleşigi jemleri jemlendi. Bu bäsleşik 4 ýylyň dowamynda GDA-nyň 11 ýurdundan 1100-den gowrak ýaş alymlary bir ýere jemledi. Bäsleşik A.A.Gromyko adyndaky Daşary syýasaty öwreniş birleşigi, Belarussiýanyň Prezidentiniň ýanyndaky Dolandyryş akademiýasy, Russiýa Federasiýasynyň Ylymlar Akademiýasynyň Ýewropa instituty tarapyndan gurnalýar.
2021-nji ýylda bäsleşige gatnaşmak üçin GDA-nyň 11 ýurdundan 513 sany ýaş hünärmenleriň we halkaraçy talyplaryň 472 sany ylmy makalasy kabul edildi. Bäsleşige gatnaşyjylar Beýik Watançylyk urşunyň taryhy hakydasy, BMG-niň häzirki zaman dünýäsindäki orny, Ýewraziýa giňişliginde integrasiýa prosesleri we diplomatiýa, Ýewropa bileleşigi we GDA-nyň daşary syýasat ugry bilen baglanyşykly özboluşly ylmy işlerini taýýarladylar.
GDA-nyň 11 ýurdundan 54 gatnaşyjy ýaryşyň jemleýji tapgyryna çykdylar. Finalistleriň arasynda Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 2-nji ýyl talyplary Dilnoza Muhadowanyň, Ýulduz Babamyradowanyň, TDIM HGI-niň Halkara hukugy we deňeşdirme hukuk öwreniş kafedrasynyň mugallymy Aýjan Omarowanyň hem bolmagy Watanymyzyň halkara abraýynyň artmagyna özboluşly goşant boldy. Türkmenistanyň Daşary işler ministrliginiň Halkara gatnaşyklary institutyndan gatnaşyjylara degişli şahadatnamalar we diplomlar finalistleriň makalalar ýygyndysy bilen bilelikde ugradyldy.
Dilnoza MUHADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.