Garaşsyzlyk baýramyna bagyşlandy
Her ýyl uly şatlyk-şowhuna beslenýän Garaşsyzlyk baýramy diňe bir Diýarymyzda däl, eýsem, ýurdumyzyň daşary ýurtlarda ýerleşýän Ilçihanalary tarapyndan hem giň gerimde bellenilýär. «Pähim-paýhas ummany Magtymguly Pyragy» ýylynda mukaddes Garaşsyzlygymyzyň şanly 33 ýyllygy mynasybetli Türkmenistanyň Täjigistan Respublikasyndaky Ilçihanasynyň guramagyndaky Duşenbe şäheriniň «Hyatt Regency» myhmanhanasynda geçirilen baýramçylyk dabarasynda hem ýokary ruhubelentlige beslendi.
Dabara täjik tarapyndan esasy myhman hökmünde Täjigistan Respublikasynyň Premýer-ministriniň orunbasary, Daşary işler ministriniň orunbasary hem-de ýurduň Medeniýet, Oba hojalyk, Energetika we suw serişdeleri, Ulag, Senagat we täze tehnologiýalar, Bilim we ylym ministrlikleriniň wekilleri, ýokary okuw mekdepleriniň rektorlary, Täjigistanyň Milli ylymlar akademiýasynyň ýolbaşçylary, Täjigistanda akkreditirlenen diplomatik wekilhanalarynyň ýolbaşçylary gatnaşdylar.
Baýramçylyk dabarasynda Türkmenistanyň Täjigistan Respublikasyndaky Ilçisi Aýmyrat Goçmyradow çykyş etmek bilen, garaşsyzlyk ýyllary içinde türkmen-täjik gatnaşyklarynyň ählitaraplaýyn ösdürilişi, iki halky birleşdirýän däp-dessurlar, medeni-ruhy ýakynlyklar dogrusynda aýratyn belläp geçdi.
Soňky 33 ýylyň içinde Türkmenistanyň içeri we daşary syýasatynda gazanylan üstünlikler, halkara gatnaşyklarynda goldanylan başlangyçlar, ähli ulgamlarda ýetilen belent sepgitler barada taýýarlanylan ýörite wideoroligiň görkezilmegi dabara ýygnananlarda aýratyn täsir galdyrdy.
Dabaranyň dowamynda türkmen halkynyň Milli Lideri, Gahryman Arkadagymyzyň «Pähim-paýhas ummany Magtymguly Pyragy» atly goşgusynyň täjigistanly türkmen aýdymçysy tarapyndan ýerine ýetirilmegi myhmanlarda ýatda galyjy pursatlary döretdi. Şeýle-de, dabarada täjik halkynyň milli aýdymlary hem ýerine ýetirildi.
Dabaranyň çäginde milli medeniýetimiziň, zergärçilik, amaly-haşam sungatymyzyň, däp-dessurymyzyň waspyny ýetirýän giň gerimli sergi gurnaldy hem-de türkmen medeniýetini şöhlelendirýän suratlar ýerleşdirildi. Hususan-da, sergide Gahryman Arkadagymyzyň we Arkadagly Gahryman Serdarymyzyň kitaplaryna aýratyn orun berildi. Baýramyçylyk dabarasynyň ahyrynda ýurdumyzyň daşary syýasatynda we diplomatiýasynda dünýä nusgalyk beýik işleri durmuşa geçirýän türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň adyna alkyş sözleri belentden ýaňlandy.
Aýlar ATAJYKOWA, Aýna BABAÝEWA,
Türkmenistanyň Daşary işler ministrliginiň
Halkara gatnaşyklary institutynyň V ýyl talyplary.
(Türkmenistanyň Täjigistan Respublikasyndaky Ilçihanasy, Duşenbe ş.)