«GARAŞSYZ WATANYM – BAGTYÝARLYK MEKANYM» ATLY OKUW SEMINARY GEÇIRILDI
2026-njy ýylyň 6-njy martynda Türkmenistanyň Daşary işler ministrliginiň Halkara gatnaşyklary institutynda ýylyň şygary we Halkara zenanlar güni mynasybetli institutyň Halkara gatnaşyklary fakultetiniň 3-nji ýyl talyplarynyň gatnaşmagynda iňlis dilinde «Garaşsyz Watanym – bagtyýarlyk mekanym» atly okuw seminary geçirildi. Ony Dünýä dilleri kafedrasynyň uly mugallymy Çemen Baýryýewa alyp bardy.
Bu okuw seminaryň başynda Çemen Baýryýewa çykyş edip, talyplara Garaşsyzlygymyzyň gazanan üstünlikleri we ýurdumyzyň ösüşleri barada gyzykly gürrüňleri berdi. Şeýle-de ýurdumyzda zenanlara goýulýan hormat-sarpa, olara döredilýän mümkinçilikler, häzirki zaman diplomatiýasynda zenanlaryň orny barada giňişleýin beýan etdi.
Seminaryň esasy maksady ýaşlaryň watansöýüjilik duýgularyny we milli buýsanjyny has-da berkitmekden ybarat boldy. Soňra talyplar Halkara zenanlar gününiň taryhy, zenanlaryň parahatçylygy berkarar etmekdäki goşantlary, olaryň jemgyýetdäki orny barada çykyşlarynda bellediler. Maslahatyň dowamynda talyplar Halkara zenanlar gününe bagyşlanyp taýýarlanan soraglara jogap bermek arkaly öz aralarynda bäsleşdiler. Soraglara jogap berip, talyplar oňa işjeň gatnaşdylar. Bu bolsa talyplaryň özara tejribe alşyp, täze bilimlere eýe bolmagyna itergi berdi. Maslahata gatnaşanlar ýaşlaryň bilimli bolmaklary ugrunda aladalary edýän Gahryman Arkadagymyzyň we hormatly Prezidentimiziň adyna alkyşly sözlerini beýan etdiler.
Sahydöwlet HÜMMETJUMAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.