GADYMY NUSAÝ GALASYNA GEZELENÇ
2025-nji ýylyň 15-nji oktýabrynda Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň ýanynda hereket edýän “Paýhas we parasat” gurnagynyň hem-de Halkara gatnaşyklary we diplomatiýa kafedrasynyň guramagynda “Nusaý” taryhy-medeni döwlet goraghanasyna gezelençe gidildi.
Gezelençde “Nusaý” taryhy-medeni döwlet goraghanasynyň ýörite wekilleriniň Parfiýa şalygynyň ilkinji paýtagty bolan “Mitridarkert” şäheri bolan Köne Nusaý galanyň taryhy ýadygärlikleri, özboluşly binagärçilik aýratynlyklary baradaky beren gürrüňleri has-da täsirli boldy. Goraghanada institutymyzyň mugallymlary hem Beýik Ýüpek ýolunyň ugrunda ýerleşen Nusaý şäheriniň halklaryň söwda, diplomatik, medeni gatnaşyklarynda möhüm ähmiýete eýe bolandygy, Rim we Hytaý ýaly uly imperiýalaryň arasynda ýerleşen gadymy Parfiýa ýurdunyň Günbatar bilen Gündogar ýurtlarynyň özara gatnaşygyndaky möhüm orny barada giňişleýin gürrüň berdiler. Soňra taryhy ýerler bilen baglanyşykly özara sorag-jogap alşylmagy gezelenjiň täsirini has-da artdyrdy.
Geçmişde ata-babalarymyz tarapyndan döredilen döwletleriniň arasynda ilkinji bitaraplyk syýasatyny ýöreden, ilkinji ilçi-diplomatik gatnaşyklary resmi esaslarda ýola goýan Parfiýa döwletidir. Ýagny, b.e. 107-nji ýylda ilkinji Hytaý ilçisi Parfiýa gelipdir we ony 20 müň atly bilen ugradypdyrlar. Gadymy Parfiýanyň goňşulary bilen hoşniýetli gatnaşyklary barada hytaý çeşmelerinde beýan edilýär. Dünýä taryhynda uly yz goýan Parfiýa patyşalygynyň ilkinji paýtagty bolan Nusaý şäherine baryp, bu gadymy ýadygärligi gözleriň bilen synlamak has-da ýatdan çykmajak pursatdyr.
2007-nji ýylda ÝUNESKO-nyň Bütindünýä Mirasynyň sanawyna girizilen Nusaý galalaryna syýahat “Paýhas we parasat” ylmy gurnagynyň işjeň agzalarynyň taryhy geçmişimiz baradaky düşünjeleriniň has-da baýlaşmagyna getirdi. Ýaş nesilleriň zehin-başarnygyny kämilleşdirmäge döredip beren giň mümkinçilikleri üçin Gahryman Arkadagymyza, Arkadagly Gahryman Serdarymyza tüýs ýürekden alkyş aýdýarys.
Rejepguly MAŞADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.