«FRANKOFONIÝA – 2026» BÄSLEŞIGINIŇ JEMLEÝJI TAPGYRY WE ÝEŇIJILERI SYLAGLAMAK DABARASY
2026-njy ýylyň 4-nji aprelinde Türkmenistanyň Daşary işler ministrliginiň Halkara gatnaşyklary institutynda «Frankofoniýa – 2026» bäsleşiginiň jemleýji tapgyry we ýeňijileri sylaglamak dabarasy uly ruhubelentlik bilen geçirildi. Çäräniň açylyşynda Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa, Türkmenistanyň Bilim ministrliginiň Halkara hyzmatdaşlyk bölüminiň baş hünärmeni Ezizmuhammet Mämmedow we Fransiýanyň Türkmenistandaky Adatdan daşary we Doly ygtyýarly ilçisi Filipp Merlen gutlag sözi bilen çykyş etdiler. Bu dabaraly waka «Hereketde bolmak» («En mouvement») şygary astynda geçirilýän giň gerimli «Frankofoniýa – 2026» baýramçylygynyň iň möhüm bölegine öwrüldi.
Däp bolşy ýaly, her ýylyň 20-nji martynda dünýä jemgyýeti tarapyndan bellenilýän halkara Frankofoniýa güni bu ýyl hem aýratyn ähmiýete eýe boldy.
2026-njy ýylyň maksatnamasyna aýdym aýtmak, dilden dürs ýazuw, düzme ýazmak bäsleşikleri, şeýle hem mekdep okuwçylarynyň arasyndaky fransuz dili boýunça olimpiadanyň diktant, test we söhbetdeşlik tapgyrlary girizildi.
Bu çäre Fransiýanyň Türkmenistandaky ilçihanasynyň ýanyndaky Fransuz instituty we Türkmenistanyň Bilim ministrligi, Türkmenistanyň Daşary işler ministrligi tarapyndan, şeýle hem fransuz dilinde gepleýän ýurtlaryň: Belgiýanyň, Rumyniýanyň, Şweýsariýanyň, Kanadanyň, Ermenistanyň, Ukrainanyň ilçihanalarynyň hem-de Ýewropa Bileleşiginiň ýakyndan goldamagynda guraldy. «Frankofoniýa – 2026» bäsleşigine «TotalEnergies», «Bouygues Turkmen», «Boutique de Paris», «Eurocosmetics», «Lacoste», «La Tartine», «Swiss Best», «Alliance», «Le.Travel», «Dessange International» kompaniýalary hemaýatkärlik etdiler.
Bäsleşige fransuz diline we medeniýetine höwesli talyplar, mekdep okuwçylary hem-de Fransuz institutynyň diňleýjileri işjeň gatnaşyp, öz bilimlerini we ukyplaryny görkezdiler.
Döredijilik we intellektual bäsleşikleriň ähli ýeňijilerine dabaraly ýagdaýda bäsleşigiň guramaçylaryndan we hemaýatkärlerinden diplomlar we gymmat bahaly sowgatlar gowşuryldy.
«Frankofoniýa» diňe bir bäsleşik bolman, eýsem fransuz dilini öwrenýänler üçin Fransiýanyň baý medeni dünýäsine aralaşmaga we özara tejribe alyşmaga döredilen platformadyr. Geçirilen bu çäreler Türkmenistanda fransuz diliniň we medeniýetiniň wagyz edilmegine, şeýle-de iki ýurduň arasyndaky medeni-ynsanperwer gatnaşyklaryň täze derejä göterilmegine goşant goşýar.
Şöhle BAÝMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.