Esasy Öndürijilik Görkezijiler boýunça onlaýn seminar geçirildi
2024-nji ýylyň 14-nji dekabrynda Halkara ynsanperwer ylymlary we ösüş uniwersiteti tarapyndan Esasy Öndürijilik Görkezijiler (KPI) boýunça onlaýn seminar geçirildi. Bu seminara Türkmenistanyň Daşary işler ministrliginiň Halkara gatnaşyklary institutynyň okuw bölüminiň, işgärler we ýörite bölüminiň şeýle hem, Sanly ulgamlar we kommunikasiýa bölüminiň hünärmenleri gatnaşdylar.
Esasy Öndürijilik Görkezijiler (KPI) guramalaryň öňünde goýlan maksatlara ýetmekde üstünlikleri ölçemek üçin möhüm görkeziji ölçeglerdir. Olar ösüşi, netijeliligi bahalandyrmak we dürli pudaklarda, şol sanda dolandyryş, bilim we işewürlik boýunça kararlary kabul etmek üçin ulanylýar. Seminaryň maksady, oňa gatnaşyjylary dolandyryş işlerinde Esasy Öndürijilik Görkezijileriň amaly taýdan ulanylyşy bilen tanyşdyrmak.
Seminaryň dowamynda gatnaşyjylar Esasy Öndürijilik Görkezijileriň (KPI) dolandyrylmagy üçin häzirki zaman programma üpjünçilik gurallaryny ulanmak barada pikir alyşdylar, olary dolandyryş işlerinde dogry ulanmagyň usullaryny öwrendiler.
Tirkeş DÖWLETNAZAROW,
Türkmenistanyň Daşary işler ministrliginiň
Halkara gatnaşyklary institutynyň
Sanly ulgamlar
we kommunikasiýa bölüminiň 1-nji derejeli inženeri.