EL HÜNÄRI- IL GEZER
2022-nji ýylyň 5-nji martynda Türkmen Döwlet medeniýet institutynda ýurdumyzyň ýokary okuw mekdepleriniň talyp ýaşlarynyň arasynda yglan edilen “El hünäri - il gezer” atly hünär bäsleşiginiň jemleýji tapgyry geçirildi. Oňa ýurdumyzyň ýokary okuw mekdepleriniñ saýlama toparlary bilen birlikde institutymyzyň Halkara gatnaşyklary fakultetiniň I ýyl talyby Batyr Esenow, II ýyl talyby Akgözel Rasulowa, Halkara ykdysady gatnaşyklary fakultetiniň II ýyl talyby Enegül Annamyradowa, Halkara žurnalistikasy fakultetiniň I ýyl talyplary Şöhrat Ataýew, Annaberdi Kaşaňow we köpçülikleýin habar beriş serişdeleriniň wekilleri gatnaşdylar. Bäsleşikde talyp ýaşlar jorap, alaja örmek, keşde çekmek, haly dokamak, hem-de milli mirasymyzy çeper aýdyşyklar arkaly taryp etmek, zergärçilik we küýzegärlik önümlerini ýasamak ýaly ugurlar boýunça bäsleşdiler.
Ýaryşyň dowamynda talyp ýaşlaryň ýerine ýetirmeginde “Halkyň Arkadagly zamanasy” ýylyny, Gahryman Arkadagymyzyň baştutanlygynda alnyp barylýan beýik işleri, ýetilen belent sepgitleri, halkymyzyň baý geçmiş mirasyny, medeni gymmatlyklarymyzy wasp edýän goşgularyň, şeýle hem Prezidentimiziň dürdäne setirlerinden dörän ajaýyp kitaplaryndan milli medeniýetimiz bilen baglanyşykly hekaýalaryň, rowaýatlaryň, çeper sözleriň aýdylmagy bäsleşige aýratyn millilik öwüşginlerini berdi.
Ata-babalarymyzdan we ene-mamalarymyzdan nesilden-nesle geçip, dowam edip gelýän milli el işleriniň görnüşlerini, milli baýramçylyklarymyzy, taryhy we medeni ýadygärliklerimizi, dutar ýasamak senedini, sazçylyk sungatyny özünde jemleýän folklor çykyşlary bäsleşigiň many-mazmunyny has-da artdyrdy.
Bäsleşigiň netijesinde ýeňiji bolan talyplar Türkmenistanyň Bilim ministrliginiň adyndan taýýarlanylan ýadygärlik sowgatlar we hormat hatlary bilen sylaglandyryldylar.
Akgözel RASULOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.