Dünýäniň bar görki enedir, ene!
2022-nji ýylyň 4-nji martynda Türkmenistanyň Daşary işler ministrliginiň Halkara gatnaşyklary institutynda I, II ýyl talyplarynyň gatnaşmagynda Halkara zenanlar güni mynasybetli «Dünýäniň bar görki enedir ene!» atly bäsleşik geçirildi. Institutyň Dünýä dilleri kafedrasynyň «Lingvo World» gurnagynyň guramagynda geçirilen bäsleşik üç tapgyrdan ybarat boldy. Täsirli geçen bäsleşigiň birinji tapgyrynda talyplar mähriban ejelerini goşgudyr hekaýalar bilen dürli dillerde wasp etdiler. Ikinji tapgyrynda bolsa talyplar dünýäde meşhur bolan, taryhda yz galdyran zenanlar barada prezentasiýalar arkaly tanyşdyrdylar. Şeýle-de bäsleşigiň üçünji tapgyrynda talyplar dürli dillerde zenanlar barada aýdylan dana sözleri ara alyp maslahatlaşdylar.
Bäsleşik talyplaryň ukyp-başarnyklaryny ýüze çykarmak, özbaşdak pikirlenmek, işlemek endiklerini artdyrmak, sapaga has işjeň gatnaşmaklaryny gazanmak maksady bilen geçirildi. Bäsleşigiň netijeleri boýunça Halkara gatnaşyklary fakultetiniň talyplary I orna, Halkara žurnalistikasy fakultetiniň talyplary II orna, Halkara hukugy fakultetiniň talyplary III orna mynasyp boldular.
Güljahan GARLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.