Döwletlilik ýörelgeli ajaýyp kitap
Berkarar döwletimiziň bagtyýarlyk döwrüniň häzirki dowam edýän «Türkmenistan-parahatçylygyň we ynanyşmagyň Watany» ýylynda ýurdumyzyň her bir güni uly üstünliklere we ajaýyp wakalara beslenýär. Bu ýylyň Watanymyzyň şanly Garaşsyzlygynyň 30 ýyllyk baýramy bilen gabat gelmegi ýurdumyzyň ýeten sepgitleriniň, gazanan üstünlikleriniň many-mazmunyny has-da artdyrýar. Şeýle ajaýyp pursatlarda Garaşsyzlygymyzyň 30 ýyllygy mynasybetli Mähriban Prezidentimiz filosofik garaýyşly döwletlilik ýörelgeli «Garaşsyzlyk-Bagtymyz» atly täze kitabyny peşgeş bermegi halkymyzyň ruhubelentligini has-da belende göterdi.
Türkmen, rus we iňlis dillerinde neşir edilen köp sanly owadan suratlar bilen bezelipdir. Kitabyň «Howpsuz, özerkli ýaşaýşyň galasy», «Türkmen halky-döwlet häkimiýetiniň ýeke-täk eýesi», «Budur türkmen binasy», «Galkynyşyň ösüşiniň, bagtyýarlygyň täze taryhy eýýamy», «Gözbaşlar joşly bolsa, bagtyňdan rowaçlyk hem üstünlik çykar», «Türkmen topragy-bereket mekany», «Türkmen halky-dörediji we gurujy halk», «Nusgalyk işler, ilkinjilik, täze önümçilikler, baý tejribe-ösüşiň özeni!», «Ýoluňyz ak bolsun!», «Kalbyňyz we ojagyňyz nurly bolsun!», «Ýaşyl ykdysadyýet-ýaşaýyş ýörelgesi», «Bazary baryň baýlygy bar» hem-de «Garaşsyzlyk bilen geçmişlidiris, şu günlidiris we geljeklidiris» diýen mowzuklary öz içine alýan 13 babynyň her birinde Garaşsyzlygymyzyň 30 ýylynyň içinde halk hojalygymyzyň dürli pudaklarynda asyrlara barabar bitirilen işlere baha berlip, olaryň jemleri jemlenilýär.
Garaşsyz Türkmenistanyň kemala gelşiniň möhüm tapgyrlaryny beýan edýän kitapda bellenilişi ýaly, dünýä ykdysadyýeti üçin çylşyrymly döwre garamazdan, Durnukly ösüş maksatlaryna ýetmek üçin hemme çäreleriň görlendigi ýurdumyzyň ösüşiň täze belentliklerine göterdi. Ajaýyp eserde Diýarymyzyň ykdysady kuwwatyny ýokarlandyrmaga, daşary ýurtdan getirilýän harytlaryň ornuny tutýan önümçiligiň we eksport ugurly önümleriň görnüşlerini giňeltmäge, Türkmenistany ýokary derejeli senagat döwletine öwürmäge gönükdirilen özgertmeler öz mynasyp beýanyny tapýar. Kitapda parahatçylygyň, öňe gitmegiň we ähli adamzadyň ýagty gelejeginiň hatyrasyna halklary birleşdirýän pikirleriň ähmiýeti okyjylara giňden açylyp görkezilýär.
Arkadagymyzyň öz halkyna sowgat beren bu ajaýyp kitaby ýaşlara görelde mekdebi bolup durýar. Biz, talyplar ata Watanmyzyň mukaddes Garaşsyzlygynyň şanly 30 ýyllyk senesine bagyşlan ajaýyp döredijilik sowgady üçin Mähriban Prezidentimize talyp ýüregimizden hoşallygymyzy bildirýäris! Goý, Gahryman Arkadagymyzyň jany sag, il-ýurt bähbitli, döwlet ähmiýetli tutýan tutumly işleri mundan beýläk hem rowaçlyklara beslensin!
Şamyrat BEGENJOW,
Türkmenistanyň Daşary işler ministrliginiň
Halkara gatnaşyklary institutynyň I ýyl talyby.