“DIALOG – PARAHATÇYLYGYŇ KEPILI” ATLY BRIFING GEÇIRILDI
2025-nji ýylyň 28-nji noýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň hemişelik Bitaraplygynyň 30 ýyllygy mynasybetli “Dialog – parahatçylygyň kepili” atly brifing geçirildi. Oňa ýurdumyzyň ýokary okuw mekdeplerinden, şol sanda Türkmenistanyň Daşary işler ministrliginiň Halkara gatnaşyklary institutyndan Halkara parahatçylyk we ynanyşmak ýyly mynasybetli geçiriljek ýokary wekilçilikli forumda meýletinçilik, terjimeçilik we wagyzçylyk etjek ýaş mugallymlar we talyplar gatnaşdylar.
Brifingde çykyş edenler ýurdumyzyň alyp barýan parahatsöýüjilikli we ynsanperwerlige esaslanýan daşary syýasaty, onuň sebit hem ählumumy derejede parahatçylygy, howpsuzlygy we durnukly ösüşi üpjün etmekdäki möhüm ähmiýeti, şeýle-de Halkara Bitaraplyk gününde geçiriljek ýokary wekilçilikli forum barada giňişleýin belläp geçdiler. Aýratynda, bu halkara ähmiýetli forumda ýaşlaryň meýletinçilik etmegi we onuň ýaş nesliň geljekki hünär ukyplaryny artdyrmakdaky orny dogrusynda nygtalyp geçildi.
Brifingiň dowamynda ýaş meýletinçiler özleriniň gyzyklanýan ugurlary boýunça soraglary berdiler we gerekli jogaplary aldylar. Meýletinçi ýaşlar bu forumda halkara gatnaşyklary we diplomatiýa, halkara žurnalistikasy we diplomatik protokol babatda uly tejribe toplarlar.
Birifingiň geçirilmegi ýaş nesilleriň türkmen Bitaraplygynyň ýörelgeleri we onuň ata Watanymyzyň halkara abraýyny ösdürmekdäki ähmiýeti dogrusyndaky bilimlerini has-da artdyrmaga ýardam etdi.
Hudaýberdi ROZYKOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
4-nji ýyl talyby.