Daşkent şäherinde Türkmenistanyň Garaşsyzlygynyň 34 ýyllyk baýramyna bagyşlanan dabaraly çäre geçirildi
2025-nji ýylyň 18-nji sentýabrynda Daşkent şäherinde Türkmenistanyň Özbegistan Respublikasyndaky Içihanasynyň, Özbegistan Respublikasynyň milletara gatnaşyklar we dașary ýurtly watandaşlar baradaky komitetiniň we Özbegistan Respublikasynyň medeniýet merkeziniň bilelikde guramagynda Türkmenistanyň we Özbegistan Respublikasynyň Garaşsyzlygynyň 34 ýyllyk baýramyna bagyșlanan
“Türkmen-özbek gatnaşyklary – täze taryhy tapgyrda” atly dabaraly çäre geçirildi. Bu çärä Türkmenistanyň Özbegistan Respublikasyndaky Ilçihanasynyň işgärleri, Özbegistan Respublikasynyň milletara gatnaşyklar we daşary ýurtly watandaşlar baradaky komitetiniň, Özbegistan Respublikasynyň medeniýet merkeziniň, köpçülikleýin habar beriş serişdeleriniň wekilleri, şeýle hem türkmen we özbek talyplary gatnaşdylar. Çäräniň dowamynda Özbegistan Respublikasynyň milletara gatnaşyklar we dașary ýurtly watandaşlar baradaky komitetiniň bașlygy Kahraman Sariýew, Türkmenistanyň Özbegistan Respublikasyndaky Adatdan daşary we Doly ygtyýarly ilçisi Şadurdy Meredow, Özbegistan Respublikasynyň Oliý Majlisiniň Kanun çykaryjy palatasynyñ deputaty we Türkmen medeniýet merkeziniň başlygy Güldana Awezdurdiýewa hem-de Türkmenistanyň Dașary işler ministrliginiň Halkara gatnaşyklary institutynyň 5-nji ýyl talyby Gülruh Geldiýewa dagy çykyş etdiler.
Çykyş edenler türkmen we özbek halklarynyň gadymy taryhynyň, milli däp-dessurlarynyň meňzeşlikleri, iki halkyň arasyndaky asyrlaryň jümmüşinden gözbaş alýan söwda-ykdysady we medeni-ynsanperwer döwletara gatnaşyklarynyň häzirki günlerde-de işjeň ösdürilýändigi barada aýratyn belläp geçdiler.
Dabaraly çäräniň ahyrynda oňa gatnaşyjylar Türkmenistanyň we Özbegistanyň Döwlet Baştutanlaryna biziň ýurtlarymyzyň arasynda dost-doganlyk gatnaşyklaryny has-da berkitmek ugrunda alyp barýan işlerinde mundan beýläk hem uly üstünlikleri arzuw etdiler. Baýramçylyk dabarasy türkmen-özbek aýdym-sazly, tansly çykyşlar bilen utgaşdy.
Ýupar EGIRJÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 5-nji ýyl talyby.