ÇEPER HÖWESJEŇLERI SYLAGLAMAK DABARASY
2022-nji ýylyň 4-nji martynda Türkmenistanyň Daşary işler ministrliginiň Halkara gatnaşyklary institutynda “Halkyň Arkadagly zamanasy” diýlip atlandyrylan ýylynyň 18-nji fewralynda Türkmenistanyň diplomatik işgärleriniň güni mynasybetli geçirilen baýramçylyk konsertine işjeň gatnaşan talyp ýaşlara we mugallymlara institutymyzyň rektorynyň hem-de dostlukly döwletleriň Türkmenistanyň çäginde hereket edýän diplomatik wekilhanalarynyň adyndan sowgatlary gowşurylyş dabarasy boldy. Dabara institutyň talyplary we konserti guramaga işjeň gatnaşan, aýdym-saz toparyna ýolbaşçylyk edýän mugallymlar gatnaşdylar.
Dabaranyň dowamynda Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew baýramçylyk konsertinde çykyş eden talyp ýaşlara hem-de mugallymlara hünär baýramçylygymyzy ýokary derejede guramakda, daşary ýurt aýdymlary we tanslary ussatlyk bilen ýerine ýetirmekde yhlas edip, öz ukyp-başarnyklaryny görkezendikleri üçin köp sagbolsun aýtdy. Şeýle-de bu konsertiň ýokary derejede gurnalmagy hormatly Prezidentimiziň ýolbaşçylygynda ýurdumyzyň diplomatik gatnaşyklary saklaýan döwletlerimiziň milli aýdymlaryny, tanslaryny ýerine ýetirilmek bilen halkaraçy hünärmenler hökmünde halklary ysnyşdyrýan, daşary syýasatyň medeni diplomatiýa ugruna özboluşly goşant bolandygyny nygtady.
Dabaranyň ahyrynda Garaşsyz, hemişelik Bitarap Watanymyzda bagtyýar nesilleriň eşretli durmuşda ýaşamagy, okamagy, öwrenmegi, ýokary derejeli hünärmenler bolup ýetişmegi üçin alyp barýan tutumly özgertmeler syýasatyny amala aşyrýan Gahryman Arkadagymyza alkyş sözleri aýdyldy we ýadygärlik suratlara düşüldi.
Uzukjemal ANNAMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.