Bütindünýä syýahatçylyk güni
1980-nji ýyldan bäri her ýylyň 27-nji sentýabrynda Bütindünýä syýahatçylyk güni bellenilip geçilýär. Sebäbi 1970-nji ýylyň şol senesinde dünýä syýahatçylygynyň möhüm tapgyry hasaplanýan Birleşen Milletler Guramasynyň Bütindünýä syýahatçylyk guramasynyň (UNWTO) düzgünnamalary kabul edildi we häzirki wagtda hem şol düzgünnamadan ugur alyp işleýär. Bütindünýä syýahatçylyk gününiň maksady syýahatçylygyň halkara jemgyýetçiliginiň sosial, medeni, syýasy we ykdysady gymmatlyklaryna täsir etmekdäki ähmiýeti barada habarlylygy ýokarlandyrmakdyr.
2021-nji ýyldaky Bütindünýä syýahatçylyk gününiň temasy — “Inklýuziw ösüş ugrunda syýahatçylyk”. Baýramçylygyň resmi reňki — mawy reňk.
Bütindünýä syýahatçylyk guramasy (UNWTO) BMG-niň syýahatçylyk pudagynda öňdebaryjy guramasydyr. Ol dünýäde bilim we syýahatçylyk syýasatlaryny ösdürmekdäki pudaga ýolbaşçylyk edýär. Onuň maksady syýahatçylygy ykdysady ösüşiň we daşky gurşawyň durnuklylygynyň hereketlendirijisi hökmünde ösdürmekdir.
Baýnazar NEPESOW,
Türkmenistanyň Daşary işleri ministrliginiň
Halkara gatnaşyklary institutynyň
Halkara gatnaşyklary
fakultetiniň II ýyl talyby.