Bütindünýä Kosmos hepdeligi
Bütindünýä Kosmos hepdeligi — ynsanyýeti kämilleşdirmek üçin ylmyň we tehnologiýanyň goşantlarynyň halkara çäreler bilen bellenilýän hepdeligidir.
1967-nji ýylyň 10-njy oktýabrynda «Aý we asman jisimlerini öz içine alýan Kosmosyň gözlegi we ony peýdalanmak üçin döwletleriň işlerini düzgünleşdirýän ýörelgeler baradaky şertnamasyna» birnäçe ýurtlar tarapyndan gol çekilip, güýje gireni üçin Birleşen Milletler Guramasy 1999-njy ýylda 4 — 10-njy oktýabr aralygyny «Bütindünýä Kosmos hepdeligi» diýip yglan etdi.
Kosmos hepdeliginiň oktýabr aýynda bellenilmeginiň ýene-de bir sebäbi adam tarapyndan ýasalyp, kosmosa üstünlikli iberilen ilkinji hemra bolan «Sputnik-1» bilen baglydyr. Ol 1957-nji ýylyň 4-nji oktýabrynda Sowet Soýuzy tarapyndan uçurylýar. «Sputnik-1»-iň uçurylmagynyň netijesi kosmos gözlegine başlanan möhüm tapgyr hasaplanylýar.
Bütindünýä Kosmos hepdeligi her ýyl dünýäniň kosmos agentlikleri, howa ýollarynyň kompaniýalary, mekdepler, ýokary okuw jaýlary, muzeýler we astronomiýa merkezleri tarapyndan guralýan çäreler bilen üstünlikli bellenilip geçilýär. Şol çäreleriň netijesinde ýaşlaryň tehnologiýa, inženerlik we matematika, astronomiýa, fizika ýaly bilim ugurlarynda habardarlygy ýokarlanýar hem-de olarda bu ylymlara bolan gyzyklanma artýar.
Häzirki wagtda dünýäniň ähli ýurtlarynda astronomiýa ylmyna uly üns berilýär. Şeýlelik bilen, asman giňişligindäki jisimleri, planetalary öwrenmek hem-de kosmosda düýpli ylmy barlaglary amala aşyrmak üçin köp işler durmuşa geçirilýär.
Aýläle HEMRANAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.