Bütindünýä bosgunlar güni mynasybetli okuw sapagy geçirildi
2023-nji ýylyň 20-nji iýunynda Halkara ynsanperwer ylymlary we ösüş uniwersitetinde Bütindünýä bosgunlar güni mynasybetli okuw sapagy geçirildi. Bu okuw sapagyna Halkara ynsanperwer ylymlary we ösüş uniwersitetiniñ, Magtymguly adyndaky Türkmen döwlet uniwersitetiniñ, Türkmenistanyñ Daşary işler ministrliginiñ Halkara gatnaşyklary institutynyñ talyplary we halypa mugallymlary gatnaşdylar. Sapagy iňlis dilinde Birleşen Milletler Guramasynyñ Bosgunlaryñ işi baradaky Ýokary komissarynyñ Müdirliginiñ (UNHCR) wekilleri alyp bardylar. Okuw sapagynda Sergeý Gaýna we Balžan Oşakbaýewa bosgunlar barada düşünje berip, olaryň hukuklarynyň, azatlyklarynyň goraglylygy we dünýäde bosgunlar dogrusynda alnyp barylýan işler barada prezentasiýalaryň we wideolaryň üsti bilen giňişleýin düşündirdiler. Sapagyň dowamynda sorag – jogap alyşdy we işjeň gatnaşan talyplara sowgatlar berildi.
Aýperi BAÝRAMDURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.