BMG-niň korrupsiýa garşy göreşmek baradaky Konwensiýasyny ýerine ýetirmek boýunça talaplary berjaý etmekde ÝHHG agza döwletleriň öňdebaryjy tejribesi babatda okuw maslahaty
2025-nji ýylyň 1–2-nji aprel aralygynda Ýewropada howpsuzlyk we hyzmatdaşlyk guramasynyň Aşgabatdaky Merkezinde BMG-niň korrupsiýa garşy göreşmek baradaky Konwensiýasyny ýerine ýetirmek boýunça talaplary berjaý etmekde ÝHHG agza döwletleriň öňdebaryjy tejribesi barada okuw maslahaty geçirildi. Okuw maslahatyna Türkmenistanyň Mejlisiniň, Türkmenistanyň Maliýe we ykdysadyýet ministrliginiň we onuň garamagyndaky edaralaryň, Türkmenistanyň Baş prokuraturasynyň, Türkmenistanyň Adalat ministrliginiň, Türkmenistanyň Içeri işler ministrliginiň, Türkmenistanyň Milli howpsuzlyk ministrliginiň, Türkmenistanyň Merkezi bankynyň, Türkmenistanyň Döwlet gümrük gullugynyň, Türkmenistanyň Döwlet, hukuk we demokratiýa institutynyň, Türkmenistanyň Prezidentiniň ýanyndaky Döwlet gullugy akademiýasynyň, Türkmenistanyň Senagatçylar we telekeçiler birleşmesiniň, Türkmeni Döwlet maliýe institutynyň hem-de Türkmenistanyň Daşary işler ministrliginiň Halkara gatnaşyklary institutynyň wekilleri gatnaşdylar.
Okuw maslahatyny Ýewropada howpsuzlyk we hyzmatdaşlyk guramasynyň Serbiýa Respublikasyndaky Merkeziniň hünärmeni Zurab Sanikidze alyp bardy. Okuw maslahatynyň dowamynda ÝHHG-niň hünärmeni BMG-niň korrupsiýa garşy Konwensiýasyna we onuň gözden geçiriş mehanizminde BMG-niň agza döwletleriniň orny we wezipesi ÝHHG-niň agza döwletlerine ornaşdyrmakdaky iň gowy tejribelerini we korrupsiýanyň öňüni alyş syýasaty hakynda giňişleýin gürrüň edildi. Bu okuw maslahaty gatnaşyjylar üçin örän täsirli boldy.
Abdyrahym AKORAZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş
kafedrasynyň mugallym-öwrenijisi.