"BIRLEŞEN MILLETLER GURAMASYNYŇ OÝUNLARY" ATLY KARARNAMANYŇ KABUL EDILMEGI MYNASYBETLI HALKARA MASLAHAT GEÇIRILDI
2024-nji ýylyň 31-nji oktýabrynda türkmen diplomatiýasynyň ýokary mekdebi bolan Türkmenistanyň Daşary işler ministrliginiň Halkara gatnaşyklary institutynda Türkmenistanyň we Hindistanyň başlangyjy esasynda 2024-nji ýylyň 6-njy sentýabrynda Birleşen Milletler Guramasynyň Baş Assambleýasynyň 78-nji sessiýasynyň dowamynda «Birleşen Milletler Guramasynyň oýunlary» atly Kararnamanyň biragyzdan kabul edilmegi mynasybetli halkara maslahat geçirildi.
Bilşimiz ýaly, 25-nji oktýabrda hormatly Prezidentimiz sanly ulgam arkaly Ministrler Kabinetiniň nobatdaky mejlisini geçirdi. Mejlise türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz hem gatnaşdy. Milli Liderimiz özüniň çykyşynyň dowamynda häzirki wagtda eziz Watanymyzda sport ulgamyny ösdürmek boýunça uly işleriň alnyp barylýandygyny, ýurdumyzyň iri halkara ýaryşlara gatnaşmak bilen çäklenmän, sebit we dünýä derejeli ýaryşlaryň geçirilýän merkezine öwürlendigini belläp geçdi.
Şeýle ýokary derejeli Kararnamanyň kabul edilmegi mynasybetli türkmen diplomatiýasynyň milli mekdebinde geçen halkara maslahata Türkmenistanyň diplomatik gullugynyň ýolbaşçylary we işgärleri, Türkmenistanda akkreditlenen daşary ýurt wekilhanalarynyň hem-de halkara guramalarynyň, ýurdumyzdaky syýasy partiýalaryň, jemgyýetçilik guramalaryň ýolbaşçylary we wekilleri, ýokary okuw mekdepleriniň rektorlary, gazet-žurnallaryň redaktorlary hem-de Türkmenistanda işleýän daşary ýurt habarçylary, şeýle-de institutymyzyň mugallymlary we talyp ýaşlary gatnaşdylar.
Halkara maslahatda Türkmenistanyň Ministrler Kabinetiniň Başlygynyň Orunbasary, Daşary işler ministri R.Meredow, Birleşen Milletler Guramasynyň Çagalar gaznasynyň Türkmenistandaky wekili hanym J.Ratna, Hindistan Respublikasynyň Türkmenistandaky Adatdan daşary we Doly ygtyýarly Ilçisi hanym M. Hazarika Bhagati, Birleşen Milletler Guramasynyň Merkezi Aziýa üçin öňüni alyş diplomatiýasy boýunça Sebit merkeziniň syýasy meseleler boýunça geňeşçisi A.Hanžin, Magtymguly adyndaky Türkmen döwlet uniwersitetiniň Jemgyýeti öwreniş ylymlary kafedrasynyň müdiri A.Burunow, Türkmen Döwlet bedenterbiýe we sport institutynyň rektory H.Nunnaýew, Türkmenistanyň at gazanan tälimçisi, Halkara derejeli emin, Halkara derejeli sport ussady Ş.Mammedow dagylar çykyş etdiler.
Häzirki wagtda hormatly Prezidentimiziň parasatly baştutanlygynda ýurdumyzyň başlangyjy esasynda BMG-niň Baş Assambleýasynyň belent münberinde ençeme Kararnamalar hem-de Rezolýusiýalar yzygiderli kabul edilýär. BMG-niň Nýu-Ýork şäherinde ýerleşýän ştab-kwartirasyndan şeýle Kararnamanyň kabul edilmegi hakyndaky hoş habaryň gelip gowuşmagy ähli halkymyzda, aýratyn hem, ýaş nesillerde egsilmez şatlyk döretdi. Munuň özi Gahryman Arkadagymyzyň başlangyçlaryna esaslanýan, hormatly Prezidentimiziň baştutanlygynda alnyp barylýan parahatçylyk söýüjilik daşary syýasatynyň we sport diplomatiýasynyň dünýäde dabaralanýandygynyň ajaýyp güwäsidir. Bu möhüm resminamanyň kabul edilmegi dünýä jemgyýetçiligi tarapyndan Garaşsyz, baky Bitarap Türkmenistan ýurdumyzda sporty ösdürmek babatda alnyp barylýan işlere berlen ýokary bahadyr.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.
Bu barada şu ýerde hem okap bilersiňiz: