BILIM UGRUNDAKY HALKARA HYZMATDAŞLYGYŇ NETIJELI BEÝANY
Türkmen halkynyň Milli Lideri Gahryman Arkadagymyzyň döwletli işlerini mynasyp dowam etdirýän Arkadagly Serdarymyzyň ýolbaşçylygynda ýurdumyzyň dünýä döwletleri bilen ylym-bilim ulgamynda gatnaşyklary barha giňeýär.
2023-nji ýylyň 23-nji fewralynda Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň mugallymy Gapbar Hallyýew we Halkara ykdysady gatnaşyklary fakultetiniň 4-nji ýyl talyby Arslankerim Kerimowyň hünär kämilleşdirmek ugrunda saparda bolan mahalynda dostlukly döwletlerde bilim babatynda gazanan tejribeleri boýunça tanyşdyrylyş maslahaty geçirildi. Institutymyzyň uly mugallymy Gapbar Hallyýew bilim ulgamynda halkara hyzmatdaşlygynyň çäklerinde Germaniýanyň Akademiki alyş-çalyş gullugynyň (DAAD) çäklerinde Müsür Arap Respublikasynyň Helwan uniwersitetinde halkara bilimi dolandyrmak boýunça magistratura derejeli okuw sapaklarynyň nobatdaky tapgyryna gatnaşanda alan tejribelerini gürrüň berdi. Mundan başga-da, mugallym bilim ulgamyndaky halkara hyzmatdaşlygynyň wajyplygy, okatmagyň täze innowasion usullary, ylmy-barlag işleri geçirilende ýüze çykýan meseleler, bilim ulgamyndaky halkara hil sertifikatlary dogrusynda we okuw sapaklarynyň geçirilýän döwründe Müsür Arap Respublikasynyň gadymy ýadygärliklerine guralan medeni çäreleriň bu ýurduň medeniýeti we onuň taryhy bilen tanyşmaga mümkinçilik döredendigi barada giňişleýin gürrüň berdi.
Institutyň talyby Arslankerim Kerimow hem adybir maksatnamanyň esasynda Germaniýanyň Drezden şäheriniň Drezdeniň tehniki uniwersitetinde söwda ugry boýunça bilimleri nemes dilinde öwrenmekde kurslaryň özünde galdyran täsiri, ele alan hünär we dil bilimleriniň aýratynlygy babatynda talyp ýaşlara buýsançly gürrüň berdi.
Tanyşdyrylyş maslahatynyň ahyrynda çykyş edenler bilim babatynda halkara hyzmatdaşlygyny ösdürmekde Gahryman Arkadagymyza we Arkadagly Serdarymyza minnetdarlyk sözlerini beýan etdiler. Gahryman Arkadagymyzyň, Arkadagly Serdarymyzyň janlarynyň sag bolmagyny, belent başlarynyň aman bolmagyny arzuw etdiler.
Şeker BATYROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň II ýyl talyby.