“BILELIKDE OKALYŇ!” ATLY BÄSLEŞIK GEÇIRILDI
2026-njy ýylyň 23-nji aprelinde Türkmenistanyň Daşary işler ministrliginiň Halkara gatnaşyklary institutynda ÝUNESKO-nyň Bütindünýä kitap we awtorlyk hukugy güni mynasybetli “Bilelikde okalyň!” atly gibrid görnüşinde bäsleşik geçirildi. Bu bäsleşik Türkmenistanyň Daşary işler ministrliginiň Halkara gatnaşyklary institutynyň “Parahatçylyk medeniýeti” atly ÝUNESKO kluby we Türkmenistanyň Magtymguly adyndaky Ýaşlar guramasynyň Berkararlyk etrap geňeşiniň bilelikde guramagynda geçirildi.
Bäsleşige ýurdumyzyň ýokary okuw mekdepleriniň talyplary we magistrleri gatnaşdylar. Gatnaşyjylar dünýä edebiýatyndan saýlan eserleri boýunça iňlis dilinde prezentasiýa bilen çykyş etdiler.
Bäsleşigiň esasy maksady ýaşlaryň kitap okamaga bolan höwesini artdyrmakdan, olaryň bilim derejesini ýokarlandyrmakdan hem-de döredijilik ukyplaryny ösdürmekden ybarat boldy.
Garaşsyz eminler topary tarapyndan kesgitlenen bäsleşigiň netijeleri boýunça Türkmen döwlet maliýe institutynyň talyby Öwezgeldi Akmämmedow Baş baýraga, Türkmenistanyň Daşary işler ministrliginiň Halkara gatnaşyklary institutynyň talyby Mähri Durdynazarowa I orna, Myrat Garryýew adyndaky Türkmenistanyň Döwlet lukmançylyk uniwersitetiniň talyby Näzik Ataýewa II orna we Döwletmämmet Azady adyndaky Türkmen milli dünýä dilleri institutynyň talyby Aýsoltan Annakowa III orna mynasyp boldular. Ýeňijiler Hormat hatlary we sowgatlar bilen sylaglandylar.
Şeýle çäreler ýaşlaryň intellektual we döredijilik mümkinçiliklerini açyp görkezmekde, olaryň dünýä edebiýatyna bolan gyzyklanmasyny artdyrmakda hem-de halkara medeni gatnaşyklary ösdürmekde möhüm ähmiýete eýedir. Gatnaşyjylar ýurdumyzda ýaşlar üçin döredilýän giň mümkinçilikler, bilim ulgamynyň döwrebap ösdürilmegi üçin alnyp barylýan giň gerimli işler üçin Gahryman Arkadagymyza we Arkadagly Gahryman Serdarymyza tüýs ýürekden hoşallyk bildirdiler.
Aýgözel ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy.