“BEDEWLER HALKYMYZYŇ GENJI-BAÝLYGY, GÖZ-GUWANJY, KÖŇÜL BUÝSANJY” ATLY OKUW SAPAGY GEÇIRILDI
2026-njy ýylyň 1-nji maýynda “Garaşsyz, baky Bitarap Türkmenistan — bedew batly at-myradyň mekany” ýylynyň dabaralara beslenýän günlerinde, Türkmenistanyň Daşary işler ministrliginiň Halkara gatnaşyklary institutynda “Bedewler halkymyzyň genji-baýlygy, göz-guwanjy, köňül buýsanjy” atly okuw sapagy geçirildi. Oňa Halkara gatnaşyklary fakultetiniň talyplary gatnaşdylar.
Okuw sapagyny Halkara gatnaşyklary we diplomatiýa kafedrasynyň mugallym-öwrenijisi Selbi Gandymowa alyp bardy. Mugallym sapagy talyp ýaşlaryň milli gymmatlyklarymyza bolan sarpasyny belent tutmak hem-de türkmen medeniýetiniň aýrylmaz bölegi bolan ahalteke bedewleriniň taryhy ähmiýetini çuňňur öwrenmek maksadyna gönükdirdi. Şeýle-de türkmen bedewiniň müňýyllyklaryň dowamynda halkymyzyň iň ýakyn syrdaşyna we milli guwanjyna öwrülendigi barada gyzykly maglumatlary berdi.
Garaşsyz Diýarymyzyň geljegi bolan ýaş diplomatlaryň gatnaşmagynda geçirilen bu okuw sapagy, talyp ýaşlaryň watansöýüjilik duýgularyny ösdürmekde, milli medeniýetimize we taryhymyza bolan buýsanjyny has-da artdyrmakda uly ähmiýete eýe boldy.
Ogulşeker MUHAMMETGULYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 1-nji ýyl talyby