“AÝDYŇ GIJELER” ÖSÜŞIŇ AÝDYŇ ÝOLUNDA
Berkarar döwletiň täze eýýamynyň Galkynyşy döwründe Türkmenistanda telekeçilik ulgamy ýurdumyzyň halk hojalyk toplumynyň dürli önümçilik ulgamlarynda aýgytlaýjy orny eýeläp, döwletimiziň durnukly ösüşine öz goşandyny goşýar. Milli ykdysadyýetimiziň bu möhüm ulgamynyň işjeňleşmegi netijesinde täze iş orunlary döreýär, bäsdeşlige ukyply önümleriň görnüşleri we mukdary artýar.
Halk hojalygyň dürli pudaklary bilen birlikde öz elektron senagatymyz kemala gelýär, uly isleg bildirilýän elektron we elektrotehniki önümleriň çykarylyşy ýola goýulýar. Ylmy-tehniki ösüşi kesgitleýän bu ugruň hususylaşdyrylmagy netijesinde “Aýdyň gijeler” hojalyk jemgyýeti tarapyndan elektron önümleriniň önümçiligi barha giňeýär we kämilleşýär. Halkara ykdysady gatnaşyklary hünäri boýunça bilim alýan talyp ýaşlara bu hojalyk jemgyýetiniň ýurdumyzyň ilatynyň we kärhanalarynyň ulanýan elektron önümleriniň köp görnüşleriniň önümçiliginiň alyp barýan işi bilen has içgin öwrenmek, tanyşmak maksady bilen sapar gurnaldy. Has takygy, hojalyk jemgyýetinde dürli görnüşli LED lampalaryň, okuwçylar üçin niýetlenen öwrediji kompýuterleriň we netbuklaryň, smartfonlaryň, ölçegleri 32, 42, 55 we 65 dýuýmly ýokary hil derejeli täze smart telewizorlaryň önümçiligi bilen tanyşdyryldy. Bu bolsa geljekki halkara ykdysatçylaryň zähmet ýoluna ynamly gadam basmaklary üçin hünär bilimleriniň kämilleşmeginde uly mümkinçilik döredýär.
Ýurdumyzyň ykdysadyýetiniň döwlete degişli däl ulgamynyň häzirki ýeten derejesini kämilleşdirmekde giň gerimli umumymilli maksatnamalary durmuşa geçirýän döwlet Baştutanymyzyň alyp barýan işleri elmydama rowaçlyklara beslensin.
Mährijemal MÄMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň uly mugallymy.