“Aşgabat şäheriniň döreýiş taryhy we häzirki zaman ösüşi” atly açyk sapak
2021-nji ýylyň 17-nji maýynda Türkmenistanyň Daşary işler ministrliginiň Halkara gatnaşyklary institutynda Aşgabat şäheriniň esaslandyrylmagynyň 140 ýyllygy mynasybetli Halkara gatnaşyklary we diplomatiýa kafedrasynyň mugallymy A. Jumagulyýew “Aşgabat şäheriniň döreýiş taryhy we häzirki zaman ösüşi” temasy boýunça açyk sapak geçirdi. Oňa institutyň professor mugallymlary we talyp ýaşlary gatnaşdylar.
Sapagyň barşynda Hormatly Prezidentimiziň ýolbaşçylygynda paýtagtymyz Aşgabat şäheriniň dünýäniň iň söýülýän we jahankeşdeleriň gyzyklanma bildirýän şäherleriniň birine öwrülendigi nygtaldy. Bu günki gün Aşgabat diňe bir gözel hem-de gaýtalanmajak görki bilen tanalman, eýsem giňden ykrar edilen parahatçylyk döredijilik we umumadamzat başlangyçlarynyň öňe sürülýän, tutuş ynsanyýet bähbitli işleriň rowaç alýan merkezi hökmünde giňden tanalýar. Munuň özi dünýä halklarynyň Aşgabat şäherini «Parahatçylygyň şäheri», «Aziýanyň Ženewasy», «Merkezi Aziýanyň ýüregi» diýip atlandyrmagynda has aýdyň ýüze çykýar.
Okuw sapagynyň ahyrynda oňa gatnaşanlar Aşgabat şäheriniň taryhy bilen baglanyşykly sorag-jogap alyşdylar we berkarar döwletimizi ösüşlere tarap ynamly öňe alyp barýan hormatly Prezidentimize alkyş sözlerini aýtdylar.
Guwanç SERDAROW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 1-nji ýyl talyby.