“Arkadag” — “Al-Nassr” toparlarynyň arasynda geçirilen duşuşyga bagyşlanan press konferensiýa
2026-njy ýylyň 10-njy fewralynda Olimpiýa şäherçesiniň Olimpiýa stadionynda ýurdumyzyň “Arkadag” we Saud Arabystany Patyşalygynyň “Al-Nassr” futbol toparlarynyň tälimçileriniň hem-de futbolçylarynyň gatnaşmagynda metbugat maslahaty geçirildi. Oňa paýtagtymyzda geçiriljek halkara futbol ýaryşyny giňden beýan etmek üçin Aşgabada gelen dünýäniň dürli ýurtlarynyň we öz ýurdumyzyň köpçülikleýin habar beriş serişdeleriniň wekilleri, ýurdumyzyň ýokary okuw mekdepleriniň, şol sanda, Türkmenistanyň Daşary işler ministrliginiň Halkara gatnaşyklary institutynyň “Media toparynyň” düzümine girýän talyp ýaşlary gatnaşdylar.
“Al-Nassr” toparynyň ýolbaşçylary we türgenleri Olimpiýa şäherçesinde döredilen şertler, Olimpiýa stadionynyň amatlyklary bilen tanyşdylar. Mälim bolşy ýaly, şu günler dünýä jemgyýetçiliginiň nazary AFK-nyň II Çempionlar ligasynyň 1/8 finalynyň çäklerinde geçiriljek futbol duşuşygyna gönükdi. Munuň özi paýtagtymyzda boljak bu oýnuň halkara giňişlikdäki ähmiýetini görkezýär.
Metbugat maslahatynda “Arkadag” we “Al-Nassr” toparynyň tälimçileri we oýunçylary ýurdumyzyň hem-de dünýä döwletleriniň köpçülikleýin habar beriş serişdeleriniň wekilleri bilen duşuşyp, žurnalistleriň sowallaryna jogap berdiler.
“Arkadag” we “Al-Nassr” toparlarynyň arasynda geçiriljek duşuşyga dünýäniň 13 ýurdundan köp sanly žurnalistler gatnaşdy. Bu bolsa oňa dünýä jemgyýetçiliginiň uly gyzyklanma bildirýändigini subut edýär.
Soňra bu ýerde guralan metbugat maslahaty “Al-Nassr” toparynyň tälimçisiniň we oýunçysynyň gatnaşmagynda dowam etdi. Köpçülikleýin habar beriş serişdeleriniň wekilleri ilki myhmanlaryň Türkmenistan we onuň paýtagty baradaky pikirlerini diňlediler. Şeýle hem bu gezekki bäsleşigiň nähili geçjekdigi baradaky çaklamalar bilen gyzyklanyldy.
Myhman toparyň wekilleri türkmen topragynda mähirli kabul edilendikleri üçin hormatly Prezidentimize we Gahryman Arkadagymyza hoşallyklaryny beýan etdiler. 45 müň orunlyk stadionyň meýdançasynda örän çekeleşikli we gyzykly oýun boldy. Olar “Arkadag” toparynyň oýunçylarynyň kämillik derejesiniň ýokarydygyny, olaryň aýratyn yhlasly oýnaýandyklaryny nygtadylar.
“Arkadag” we “Al-Nassr” toparlarynyň Aşgabatda bolan duşuşygy Aziýa sportunyň taryhyna möhüm sahypany ýazdy. Şunuň bilen baglylykda, bu oýun taryhy wakalara we ýatda galyjy pursatlara beslendi.
Begenç BEKNEPESOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.