“Akylyň açary – dil” atly talyplaryň ylmy-amaly maslahaty
2024-nji ýylyň 7-nji noýabrynda Döwletmämmet Azady adyndaky Türkmen milli dünýä dilleri institutynda talyp ýaşlaryň daşary ýurt dilleri boýunça bilimlerini kämilleşdirmek hem-de olarda öwrenmäge bolan höwesi artdyrmak maksady bilen, “Akylyň açary – dil” atly talyplaryň ylmy-amaly maslahaty geçirildi. Maslahata ýurdumyzyň ýokary okuw mekdepleriniň, şol sanda, Türkmenistanyň Daşary işler ministrliginiň Halkara gatnaşyklary institutynyň hem talyp ýaşlary gatnaşdylar.
Ylmy-amaly maslahatyň umumy mejlisinde talyplar BMG-niň resmi dillerinde daşary ýurt dillerini öwrenmegiň aýratynlyklary we ähmiýeti dogrusynda çykyş etdiler.
Ylmy-amaly maslahat öz işini üç bölümçede dowam etdi.
Ylmy-amaly maslahata işjeň gatnaşandyklary üçin Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň, Halkara hukugy fakultetiniň hem-de Halkara ykdysady gatnaşyklary fakultetiniň talyplary Döwletmämmet Azady adyndaky Türkmen milli dünýä dilleri institutynyň hormat hatlary bilen sylaglandylar. Bu bolsa talyp ýaşlary ylmy iş bilen yzygiderli meşgullanmaga höweslendirýär.
Maslahatyň ahyrynda talyplar daşary ýurt dillerini öwrenmekde döredip berýän giň mümkinçilikleri üçin Gahryman Arkadagymyzyň, Arkadagly Gahryman Serdarymyzyň alyp barýan tutumly işleriniň mundan beýläk hem rowaçlyklara beslenmegini arzuw etdiler.
Kadyrberdi ORAMEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.