TÜRKMENISTAN 2028-NJI ÝYLY «HALKARA HUKUGYŇ ÝYLY» DIÝIP YGLAN ETMEGI TEKLIP ETDI
Biziň döwrümiz taryhy kanunalaýyklyk — adamzat jemgyýetiniň durmuşynyň halkaralaşdyrylmagy bilen häsiýetlendirilýär. Dürli-dürli serhetleriň bolmagyna garamazdan, ýurtlaryň bir bitewi halkara bileleşiginde özara gatnaşyk tendensiýasy ösýär. Halkara gatnaşyklary diňe bir döwletiň däl, eýsem, her bir aýratyn adamyň durmuşyna hem öz täsirini ýetirýär.
Halkara gatnaşyklar ulgamy hukugyň aýratyn görnüşi bolup, halkara hukuk kadalary bilen kadalaşdyrylýar. Halkara hukugy özbaşdak hukuk pudagydyr, ol halkara hukuk kadalaryň jemi bolup, parahatçylygy we hyzmatdaşlygy üpjün etmek maksady bilen döwletara gatnaşyklaryny düzgünleşdirýändir. Halkara hukugy umumadamzat medeniýetiniň wajyp serişdesidir. Ol halklaryň bir-birini hormatlamaklygyna hem täsir edýändir.
Halkara hukugyny öwrenmekligiň ähmiýetiniň artmagy bilen, Birleşen Milletler Guramasy oňa uly üns bermek bilen 1990—1999-njy ýyllary Halkara hukugynyň onýyllygy diýlip yglan edildi.
Häzirki wagtda dünýä bileleşigi halkara hukugynyň ösdürilmegine we ýaýramagyna degişli işleri yzygiderli amala aşyrýar. Türkmenistan hem halkara hukugynyň subýekti hökmünde bu işlere işjeň gatnaşýar.
2025-nji ýylyň sentýabr aýynda hormatly Prezidentimiz BMG-niň Baş Assambleýasynyň 80-nji ýubileý sessiýasyndaky çykyşynda möhüm başlangyç bilen çykyş etdi — 2028-nji ýyly «Halkara hukugyň ýyly» diýip yglan etmegi teklip etdi hem-de Türkmenistanyň Birleşen Milletler Guramasynyň ählumumy ugurlarda merkezi ornuny güýçlendirmegi yzygiderli goldap geljekdigini nygtady. Ol halkara hukugynyň agalygyny berkitmegiň bu maksada ýetmegiň esasydygyny belledi. Hormatly Prezidentimiziň pikirine görä, 2028-nji ýyly «Halkara hukugyň ýyly» diýip yglan etmek parahatçylygyň we halkara hyzmatdaşlygynyň hukuk esaslaryny berkitmekde möhüm ädim bolar. Bu başlangyç Türkmenistanyň hoşniýetli goňşuçylyk, dialog we özara hormat goýmak ýörelgelerine ygrarlylygyny görkezýär.
2028-nji ýylyň «Halkara hukugyň ýyly» diýip yglan edilmegi parahatçylygyň we hyzmatdaşlygyň halkara hukuk esaslaryny pugtalandyrmakda möhüm ädim bolar.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş kafedrasynyň uly mugallymy.