PARAHATÇYLYK WE YNANYŞMAK – HALKYMYZYŇ GADYMY ÝÖRELGELERI
Türkmen halky gadymy döwürlerden bäri parahatçylygy özüniň baş ýörelgeleriniň biri hasaplaýarlar. Olar dörän uruşlary, dawa-jenjelleri parahatçylygyň we özara ynanyşmagyň esasynda çözüpdirler. Türkmen halkynyň alyp barýan bu syýasatynyň baş şaýady – taryh bolup durýar. Ähli halkyň özüne mahsus taryhy bolşy ýaly, türkmen halkynyň hem özüne mahsus giň we şöhratly taryhy bar.
Oguz türkmenleriniň beýik Hun döwletiniň hökümdary Mete han goňşy Hytaý döwleti bilen hoşniýetli gatnaşyklary ýola goýupdyr. Mete hanyň döwründe iki döwletiň arasynda birek-biregiň tejribesini öwrenmek babatynda hem gatnaşyklar edilipdir. Hytaý hunlaryň döwlet edarasy üçin bilimli hünärmenleri taýýarlamakda ýardam beripdir. Hytaý ykdysatçylarynyň kömegi bilen hunlar döwlet gurluşynda salgyt ulgamyny kämilleşdiripdirler. Bu ýagdaý iki döwletiň arasyndaky oňyn gatnaşyklaryň başlangyjyny düzüpdir. Bu bolsa ýokarda aýdylanlaryň aýdyň subutnamasy bolup durýar.
Türkmen halkynyň Milli Lideri Gahryman Arkadagymyz we Arkadagly Gahryman Serdarymyzyň parasatly baştutanlygynda ýurdumyzda parahatçylygy we ynanyşmagy ýaýmakda döwlet derejesinde giň gerimli işler alnyp barylýar. Gahryman Arkadagymyzyň jöwher paýhasyndan syzylyp çykýan ajaýyp kitaplary halkymyzyň arasynda parahatçylygy ündemekde möhüm çeşmeler bolup hyzmat edýär. Gahryman Arkadagymyzyň «Türkmenistan – Bitaraplygyň mekany» atly kitabynda halkymyzyň parahatçylyga, ynanyşmaga, hoşniýetli gatnaşyklara goýýan hormat sarpasyny, ata-babalarymyzyň parahatsöýüjilik, ynsanperwerlik ýörelgelerini çuňňur paýhaslaryň üsti bilen giňden beýan edýär. «Türkmenistan – Bitaraplygyň mekany» atly kitaby içgin okadygyňça, kitapda öňe sürülýän belent pikirler parahatçylyga we ynanyşmaga söýgi döredýär. Mukaddes Garaşsyzlygymyzyň hem-de hemişelik Bitaraplygymyzyň taryhy gözbaşlara, gadymy hem mizemez köklere daýanýandygyny, halkymyzyň goşa ganadyna öwrülen bu mukaddesliklerimiziň şanly, buýsançly geljegimiziň täze gözbaşydygyny, edebi ýolumyzdygy bu kitapda aýratyn nygtalýar.
Gahryman Arkadagymyzyň bu kitapda aýdyşy ýaly, «Halkymyzyň parahatçylyk, oňuşyklyk, ynsanperwerlik ýörelgeleri häzirki döwletimiziň hemişelik Bitaraplyk hukuk derejesi we onuň pugtalanmagy bilen öz mazmunyny baýlaşdyrýar».
Türkmen halkynyň dana şahyry Magtymguly Pyragynyň pederi Döwletmämmet Azady öz goşgy setirlerinde şeýle belleýär:
«Maslahatsyz iş puşeýmanlyk bolar,
Akly-küli bolmaz, kütehdanlyk bolar».
Bu setirlerde Döwletmämmet Azady parahatçylygy, ynanyşmagy, dostlukly gatnaşyklary ýola goýmaklygy wagyz edýär. Bu goşgy setirleri türkmen halkynyň gadymy döwürlerden bäri parahatçylygy we ynanyşmagy özleriniň baş ýörelgesi edinendiklerine şaýatlyk edýär.
Türkmenistanyň başlangyjy bilen BMG-niň Baş Assambleýasy tarapyndan 2025-nji ýylyň «Halkara parahatçylyk we ynanyşmak ýyly» diýlip yglan edilmegi, ýurdumyzda ata-babalarymyzdan ebedi ýadygärlik galan parahatçylyk we ynanyşmak ýörelgeleriniň täzeden dabaralanmagynda, dünýäde ählumumy parahatçylygyň pugtalanmagynda işjeň hyzmatdaşlygy alyp barmak ugrunda köpsanly işleriň alnyp barylýandygyna güwä geçýär.
Türkmen halkynyň umumyadamzat ähmiýetli milli ýörelgelerine, gadymy gymmatlyklaryna belent sarpa goýýan, ýurdumyzyň halkara abraýyny has-da belende göterýän Türkmen halkynyň Milli Lideri Gahryman Arkadagymyza, peder ýoluny mynasyp dowam etdirýän Arkadagly Gahryman Serdarymyza tüýs ýürekden alkyşlar aýdýarys! Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, tutýan tutumly işleri elmydama rowaçlyklara beslensin!
Güljan SERDAROWA,
Türkmenistanyň Daşary işleri ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň I ýyl talyby.