Halka gulluk etmek — Haka gulluk etmek!
Şeýle şahsyýetler bar: olar diňe bir öz döwrüniň däl, eýsem, müňýyllyklaryň taryhynda şöhratly yz goýýarlar, nesiller üçin beýik işleri amal edýärler. Olar taryhy hakydalary, milli ýörelgeleri öz kalbynda jemläp, il-halkyň, döwletiň ykbalyny öz ykbaly hasaplap, mertebeli ýaşaýşyň nusgasyny görkezýärler. Şeýle beýik şahsyýetiň ady halkyň aňyna, taryhyň gatlaryna müdimi ýazylýar. Milli Liderimiziň nusgalyk ýoly, durmuş tejribesi heňňam hakykatlaryny jemleýän kitap mysaly. Ol kitabyň her gatynda asman ýaly giňlik, daglar ýaly belentlik bar, umman çuňlugyny ýada salýan pähim-parasat, çeşme suwy ýaly durulyk bar...
«IŇ BELENT SÖÝGI WATAN SÖÝGÜSIDIR»
Hemmämiziň ýadymyzdadyr, Gahryman Arkadagymyz 2023-nji ýylyň 1-nji sentýabrynda Arkadag şäherinde geçen umumy sapagyndaky çykyşynda: «Haýsy ýokary döwlet wezipesinde işlesem-de, meniň ähli oý-pikirlerim halkym bilen baglydyr. Men ömrümiň manysyny watandaşlarymyzyň asuda, bagtyýar we abadan durmuşyny üpjün etmekde, mähriban halkyma gulluk etmekde görýärin» diýip belledi. Şu nukdaýnazardan, Milli Liderimiziň bütin ömrüni ýagşylyklara beslemegi, halkymyzyň ynamyna, söýgüsine mynasyp bolmagy, berkarar döwletimizi eşretli ýaşaýşyň, bagtyň mekanyna öwürmegi ömrüniň manysyna deňäp, hemişe şu mukaddes düşünjelere hyzmat etmegi ýaş nesilleriň kalbynda iň belent söýgini, ýagny, Watan söýgüsini çuňlaşdyrýar. Hut şu söýgi bilen Gahryman Arkadagymyz ýüreklerimize, aň-üşügimize, dünýägaraýşymyza, ideýalarymyza täzeçe mazmun bagyşlaýar.
Hormatly Arkadagymyzyň beýik işleriniň, manyly ömrüniň nusgalyk bolşy ýaly, ýazan ajaýyp kitaplary hem ähli babatda gymmatly gollanmadyr. Ol eserlerde ylmyň ähli ugurlaryndan, taryhyň dürli döwürlerinden, milli edebiýatymyzyň şahalaryndan, türkmen halkynyň ýaşaýyş-durmuş ýörelgelerinden söz açylýar. Şoňa görä-de, Milli Liderimiziň kitaplary dürli dillere terjime edilip, dünýä jemgyýetçiligine ýetirilýär. Gahryman Arkadagymyz 2021-nji ýylyň oktýabrynda TASS agentliginiň baş direktorynyň birinji orunbasary Mihail Gusman bilen bolan söhbetdeşlikde: «Saz, goşgy döretmek, has takygy, esasy işimden daşgary gyzyklanma bildirýän sungatymdyr, ol iş-aladadan az-owlak ünsüňi sowmaga kömek edýär. Kitap ýazmagy bolsa esasy işimiň, döwlete we halkyma gulluk etmegiň aýrylmaz, möhüm bölegi hasaplaýaryn» diýip, döredijiligiň bu ugruna örän jogapkärli garaýandygyny, galamy ele almazdan ozal, köp sanly maglumat çeşmelerini içgin öwrenýändigini, hünärmenler bilen maslahatlaşýandygyny aýratyn belläp geçdi.
Şunlukda, ylmy-döredijilik işinden ussatlyk bilen baş çykarýan, sungatyň dürli ugurlary, sportuň ençeme görnüşleri bilen meşgullanyp, ýaşlara nusga bolýan hormatly Arkadagymyzyň paýhas çeşmesi nusgawy şahyrymyz Magtymguly Pyragynyň şygyrlaryndan, milli edebiýatymyzdan gözbaş alýar. Türkmençilik ýörelgeleri bolsa Milli Liderimiziň her bir hereketinde, pikirinde, ýaşaýyş filosofiýasynda jemlenýär. Bu ýörelgeleriň durmuşy beýanyny Berkarar döwletiň täze eýýamynyň Galkynyşy döwründe mukaddes Garaşsyzlygymyzyň we hemişelik Bitaraplygymyzyň binýadyny has-da berkitmek, parahatçylyk söýüjilige ýugrulan milli diplomatiýamyzy dabaralandyrmak, milli ykdysadyýetimiziň pudaklaryny kämilleşdirmek ugrunda alnyp barylýan işlerde aýdyň görmek bolýar.
«DIALOG — PARAHATÇYLYGYŇ KEPILI»
Ýer ýüzünde parahatçylygy üpjün etmekde diplomatiýanyň gurallaryny işjeň ulanmak häzirki zamanyň möhüm meselesi bolmagynda galýar. Şunuň bilen baglylykda, Milli Liderimiz 2024-nji ýylyň 1-nji martynda Türkiýe Respublikasynyň Antalýa şäherinde geçirilen üçünji Antalýa diplomatiýa forumyndaky çykyşynda: «Diplomatiýanyň wezipesi we manysy gepleşikleri geçirmekden, ylalaşygy gözlemekden, özara gatnaşyklaryň mäkäm köprülerini gurmakdan ybaratdyr» diýip belledi. Şunda Türkmenistanyň halkara gatnaşyklaryndaky çözgütleri, ilkinji nobatda, dost-doganlyk, hoşmeýillilik, ynsanperwerlik ýörelgelerine esaslanýar. Bu ýörelgeler parahatçylygyň beýik taglymatçysy Gahryman Arkadagymyzyň tagallalary esasynda has-da berkedi.
Bir hakykaty buýsanç bilen bellemelidiris: Merkezi Aziýa ýurtlarynyň başlangyjy bilen BMG-niň Baş Assambleýasy tarapyndan ençeme Kararnamalar kabul edildi. Şolaryň aglabasy Türkmenistan döwletimiziň, hut, Milli Liderimiziň başlangyjy bilen amala aşyryldy. Munuň özi hormatly Arkadagymyzyň anyk kesgitlenen syýasy ölçeglere, sagdyn, oňyn geljegimize gönükdirilen beýik filosofiýasynyň esasynda halkara giňişlikde Türkmenistan döwletimiziň abraýynyň barha artýandygyna şaýatlyk edýär.
Häzirki zaman dünýä syýasatynda, diplomatiýa sungatynda umumy ykrar edilen we umumadamzat gymmatlyklaryna esaslanýan ajaýyp filosofiýa bar. Ol «Dialog — parahatçylygyň kepili». Mälim bolşy ýaly, halkara gatnaşyklaryň şeýle mazmunly täze filosofiýasy Milli Liderimiziň başlangyjy bilen 2021-nji ýylyň 11- nji dekabrynda Aşgabatda geçirilen «Parahatçylyk we ynanyşmak syýasaty — halkara howpsuzlygyň, durnuklylygyň we ösüşiň esasy» atly halkara maslahatda belent ykraryny tapdy. Ol türkmen Bitaraplygynyň öňe sürýän pikir- garaýyşlarynyň özboluşly jemlenmesidir. Ol hormatly Arkadagymyzyň: «Özüňden beýgelip, il bolunýar, iliňden beýgelip, halk bolunýar, halkyňdan beýgelip, dünýä bolunýar» diýen sözleriniň iş ýüzündäki beýanydyr.
«DÜNÝÄ PAÝHAS BILEN AÝLANÝAR...»
Bu jümle dünýäniň ösüş ýolunda paýhasly sözüň, oýlanyşykly ideýanyň hoşniýetli ynsanlara täsir edip bilýändigini aňladýar. Biz bu hakykaty türkmen halkynyň Milli Lideriniň halkara media ulgamynyň wekilleri bilen duşuşyklarynda, daşary ýurtly žurnalistleriň sowallaryna beren jogaplarynda, şeýle hem ýokary derejeli duşuşyklaryň netijeleri boýunça metbugat beýannamalarynda has-da aýdyň görýäris. Şunda hormatly Arkadagymyzyň ilkinji gezek döwletimiziň iň ýokary wezipesine saýlanmagy mynasybetli, 2007-nji ýylyň 15-nji fewralynda Hytaý Halk Respublikasynyň «Sinhua» habarlar agentligine, şol ýylyň 16-njy fewralynda bolsa Russiýa Federasiýasynyň «Türkmenistan» halkara žurnalyna beren interwýularyny buýsanç bilen ýatlamalydyrys.
Mundan başga-da, Milli Liderimiziň dürli ýyllarda Hytaýyň «Ženmin Žibao» gazetiniň, «Hytaýyň halkara radiosy» radioýaýlymynyň, «Zaman Türkmenistan» gazetiniň esaslandyryjysynyň, Türkiýe Respublikasynyň, Ýaponiýanyň meşhur habar beriş serişdeleriniň habarçylarynyň, Bütinrussiýa döwlet teleradiogepleşikler kompaniýasynyň Merkezi Aziýa sebit bölüminiň ýolbaşçysynyň, «Mir» döwletara teleradiokompaniýasynyň žurnalistiniň, TASS agentliginiň baş direktorynyň birinji orunbasarynyň, Türkiýäniň döwlet teleradiokompaniýasynyň «TRT World» teleýaýlymynyň baş redaktorynyň sowallaryna jogap bermegi iň täze taryhymyza möhüm sahypalar hökmünde möhürlendi. «Dünýä paýhas bilen aýlanýar, zehin bilen nurlanýar» diýýän Milli Liderimiz özüniň çykyşlarynda ata Watanymyzyň ösüşlerini beýan edip, şöhratly taryhymyzy, milli ruhy ýörelgelerimizi, sözüň- pähimiň güýjüni, ynanyşmagyň we dialogyň gymmatyny dünýä ýetirdi. Şeýle hem bu interwýularda Gahryman Arkadagymyzyň maşgala gymmatlyklaryna garaýşy, türkmençilik ýörelgeleri, özüniň şahsy gyzyklanmalary, hünär saýlamakda ýaş nesillere maslahatlary hem beýan edilýär.
Ýeri gelende bellesek, bu halkara ähmiýetli interwýularyň mazmuny Gahryman Arkadagymyzyň «Ösüşiň täze belentliklerine tarap» atly köp jiltli kitaplarynda öz mynasyp ornuny tapdy. Halkara parahatçylyk we ynanyşmak ýylynyň mart aýynda Milli Liderimiziň millionlarça teletomaşaçysy bolan «Euronews» telekompaniýasynyň habarçysy bilen söhbetdeş bolmagy bolsa, dünýä bileleşiginiň Türkmenistan döwletimize bolan ägirt uly gyzyklanmasynyň aýdyň güwäsidir.
* * *
«Beýik ynsanlar beýik halky, beýik halklar bolsa beýik taryhy döredýärler». Hormatly Arkadagymyzyň «Hakyda göwheri» kitabyndan alnan bu jümle halkymyzyň müňýyllyklara uzaýan geçmişine, watansöýüjilik häsiýetlerine, gahrymançylygyna, ynama ygrarlylygyna, belent ahlaklylygyna ser salanyňda has- da aýdyňlaşýar. Binýady mizemez ýörelgelerden kemal tapan milli döwletlilik ýolumyz halkyň Beýik Ogly Gahryman Arkadagymyzyň paýhasy bilen dünýä ýaň salýar. Bu ýol peder kesbini mynasyp dowam etdirýän döwlet Baştutanymyzyň tagallalary bilen täze menzillere uzaýar. Goý, biziň ählimizi bir belent maksada birleşdirip, döwletimiziň şu güni we geljegi hökmünde biz — ýaşlaryň gujur- gaýratyna uly ynam bildirýän, bütin ömrüniň manysyny eziz Watanymyza, mähriban halkymyza hyzmat etmekde görýän Milli Liderimiz Gahryman Arkadagymyzyň hem-de Arkadagly Gahryman Serdarymyzyň janlary sag, belent başlary aman, döwletli işleri elmydama rowaçlyklara ýar bolsun!
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň talyby, «Nesil».