Žurnalistikanyň ähmiýetli meseleleri boýunça ussatlyk sapagy geçirildi
2024-nji ýylyň 11-nji martynda Türkmenistanyň Daşary işler ministrliginiň Halkara gatnaşyklary institutynda «BBC» telekompaniýasynyň ABŞ-nyň Türkmenistandaky ilçihanasy bilen bilelikde gurnamagynda žurnalistikanyň ähmiýetli meseleleri we «BBC» telekompaniýasynyň tejribesi boýunça ussatlyk sapagy geçirildi. Ussatlyk sapagyna Türkmenistanyň köpçülikleýin habar beriş serişdeleriniň wekilleri, Magtymguly adyndaky Türkmen döwlet uniwersitetiniň, Türkmenistanyň Daşary işler ministrliginiň Halkara gatnaşyklary institutynyň we Halkara ynsanperwer ylymlary we ösüş uniwersitetiniň talyplary hem-de mugallymlary gatnaşdylar. Ussatlyk sapagynyň maksady habarlaryň taýýarlanylyşy we dessin ýaýradylyşy, žurnalistikanyň ähmiýetli meseleleri babatynda talyp ýaşlaryň bilimlerini artdyrmakdan ybarat boldy. Sapagyň dowamynda hormatly myhman talyp ýaşlaryň häzirki zaman žurnalistikasynyň ähmiýetli meseleleri boýunça özlerini gyzyklandyrýan sowallaryna jogap berdi. Şeýle duşuşyklardyr okuw sapaklarynyň yzygiderli geçirilmegi türkmen diplomatiýasynyň milli mekdebiniň talyplary bolan halkaraçy žurnalistleriň hemmetaraplaýyn bilimlerini artdyrmagyna, žurnalistiň hünär ussatlygynyň inçe syrlaryny öwrenmekligine uly ýardam edýär.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.