Zenanlara bagyşlanan maslahat
2025-nji ýylyň 7-nji ýanwarynda Döwletmämmet Azady adyndaky Türkmen milli dünýä dilleri institutynyň mejlisler zalynda Türkmenistanyň Mejlisiniň, Birleşen Milletler Guramasynyň Bilim, ylym we medeniýet boýunça guramasy bolan ÝUNESKO-nyň işleri barada Türkmenistanyň milli toparynyň Sekretariatynyň, Türkmenistanyň Bilim ministrliginiň, Türkmenistanyň Zenanlar guramasynyň Merkezi Geňeşiniň we Döwletmämmet Azady adyndaky Türkmen milli dünýä dilleri institutynyň bilelikde guramaklarynda «Türkmen zenanlarynyň halkara hyzmatdaşlygynda we milli gymmatlyklarymyzyň dünýä dabaralanmagyndaky orny» atly dabaraly maslahat geçirildi. Oňa Türkmenistanyň Daşary işler ministrliginiň Halkara gatnaşyklary institutynyň mugallymlary hem onlaýn görnüşde gatnaşdylar. Dabarada Döwletmämmet Azady adyndaky Türkmen milli dünýä dilleri institutynyň döredijilik toparynyň taýýarlamagynda Gahryman Arkadagymyzyň döwet galamyndan, jöwher paýhasyndan dörän, parahatçylygyň, ynanyşmagyň we dost-doganlygyň ähmiýetini, onuň gadyr-gymmatyny giňden açyp görkezýän «Türkmenistan – parahatçylygyň we ynanyşmagyň Watany» atly ajaýyp goşgusynyň mazmuny esasynda taýýarlanan edebi-sazly kompozisiýa ýerine ýetirildi. Çykyş edenler dabaraly maslahatyň temasy bilen baglanyşykly birnäçe pikirleri orta atyp, halkara gatnaşyklarynda, dost-doganlygy pugtalandyrmakda, taryhy hem milli gymmatlyklarymyzy aýawly saklamakda türkmen zenanlarynyň bitirýän hyzmatlaryndan söz açdylar. Täsirli çykyşlar gyzgyn elçarpyşmlar bilen garşylandy. Dabaraly maslahatyň ahyrynda Gahryman Arkadagymyzyň «Ýaşasyn parahat durmuş!» atly ajaýyp şygrynyň mazmuny esasynda taýýarlanan aýdym institutyň talyplary tarapyndan ýerine ýetirildi. Soňra bolsa maslahata gatnaşyjylar Gahryman Arkadagymyza, hormatly Prezidentimize tüýs ýürekden çykýan hoşallyk sözlerini beýan etdiler.
Baýnazar BAÝHANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.