ZENAN TELEKEÇINIŇ DURMUŞ TEJRIBESI BILEN PAÝLAŞYLAN DUŞUŞYK
2023-nji ýylyň 8-nji dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Senagatçylar we Telekeçiler partiýasynyň Aşgabat şäher komitetiniň wekilleriniň we «MAÝAM» himiki arassalaýjy hususy kärhanasynyň ýolbaşçysy Maýa Myradowanyň hem-de hünärmenleriniň gatnaşmagynda talyplar bilen duşuşyk geçirildi.
2023-nji ýylyň 1-nji dekabrynda kärhananyň döredilmeginiň 9 ýyllygynyň şanyna täze şahamçasy açyldy we häzirki wagtda kärhana özüniň 100-den gowrak hyzmatynyň görnüşini halka ýetirýär. Duşuşyga gatnaşan talyplara telekeçilik barada täze düşünjeler, telekeçiligiň psihologiki aýratynlygy, üstünlige ýetmekde gabat gelýän kynçylyklaryň çözgüt ýollaryny tapmaklygyň usullary barada kärhananyň ýolbaşçysy özüniň 9 ýyllyk hususy işiniň tejribesini gürrüň berdi. Hakyky durmuşy tejribe bilen paýlaşylan gürrüňdeşlik talyplarda täsirli duýgulary döretmek bilen özlerinde täze pikirleriň, düşünjeleriň emele gelmegi esasynda jemlendi. Şeýle-de ýeterlik bilim almagyň, saýlan ugruňdan kemsiz baş çykarmagyň, maksada okgunly hereket etmegiň möhümdigi ýene bir gezek nygtaldy.
Duşuşygyň ahyrynda telekeçilik işlerine zenanlaryň çekilmegi bilen baglanyşykly döwlet tarapyndan döredilýän mümkinçilikler üçin Gahryman Arkadagymyza, Arkadagly Gahryman Serdarymyza minnetdarlyk sözleri aýdyldy.
Mährijemal MÄMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň uly mugallymy.