Zemin mukaddesligi
Ýakynda Gahryman Arkadagymyzyň Eýran Yslam Respublikasyna amala aşyran iş saparynyň çäklerinde dostlukly döwletiň Prezidenti Milli Liderimize pars diline terjime edilen «Enä tagzym — mukaddeslige tagzym» atly kitaby sowgat berdi. Bu kitabyň pars dilinde neşir edilmegi halkymyzda, aýratyn hem, ýaşlarymyzda çäksiz buýsanç döretdi. Şu mynasybetli 1-nji sentýabrda Türkmenistanyň Daşary işler ministrliginiň Halkara gatnaşyklary institutynda dabaraly maslahat geçirilip, amaly-haşam sungatynyň eserleriniň sergisi guraldy.
Dabaraly maslahata ýurdumyzyň medeniýet, sungat, döredijilik, bilim işgärleri, talyp ýaşlar, şeýle-de köpçülikleýin habar beriş serişdeleriniň wekilleri gatnaşdy. Dabaranyň başynda Türkmenistanyň Beýik Saparmyrat Türkmenbaşy adyndaky Baş akademiki drama teatrynyň artistleriniň ýerine ýetirmeginde «Ene — Zemin mukaddesligi» atly edebi-sazly kompozisiýa görkezildi.
Çykyş edenler türkmen halkyny, hormatly Prezidentimizi, Gahryman Arkadagymyzy «Enä tagzym — mukaddeslige tagzym» atly kitabyň pars diline terjime edilmegi bilen tüýs ýürekden gutlap, bu kitapda giňişleýin beýan edilýän ene mukaddesliginiň, Milli Liderimiziň mähriban käbesi Ogulabat ejäniň durmuş ýolunyň zenanlarymyz üçin nusgalykdygyny nygtadylar.
Dabaraly maslahatyň dowamynda ýurdumyzyň tanymal medeniýet we sungat işgärleriniň, estrada aýdymçylarynyň şowhunly çykyşlaryna hem giňden orun berildi. Ýaňlanan aýdym-sazlarda mähriban enelerimiz, eziz Watanymyz, milli gymmatlyklarymyz wasp edildi.
Dabaraly maslahatyň ahyrynda oňa gatnaşyjylar hormatly Prezidentimiziň adyna Ýüzlenme kabul etdiler.
Bakydurdy GARAÝEW,
Türkmenistanyň Daşary işler ministrliginiň
Halkara gatnaşyklary institutynyň talyby, «Watan».