ÝÜREK MÄHRI SIŇEN SUNGAT
Halkymyzyň milli mirasy jemgyýetimiziň ruhy baýlygynyň aýrylmaz bir bölegidir. Türkmen halkynyň gadymy medeni mirasy, ruhy gymmatlyklary asyrlaryň, uzak heňňamlaryň dowamynda barha baýlaşyp, kämilleşip gelýär. Berkarar döwletimiziň täze eýýamynyň Galkynyşy döwründe «Arkadag Serdarly bagtyýar ýaşlar» ýylynda Garaşsyz, baky Bitarap ýurdumyzda buýsanjymyzdan, ata-babalarymyzdan gelýän milli mirasymyza goýulýan belent sarpadan ugur alyp, 2023-nji ýylyň 13-nji sentýabrynda Türkmenistanyň Daşary işler ministrliginiň Halkara gatnaşyklary instituty Türkmenistanyň Döwlet medeniýet merkeziniň Döwlet muzeýine «Ýürek mähri siňen sungat» ady bilen gezelenç gurady. Gezelenje Türkmenistanyň Daşary işler ministrliginiň Halkara gatnaşyklary institutynyň mugallymlary we talyp gyzlary gatnaşdylar.
Bu ýerde milli amaly-haşam sungatynyň ajaýyp eseri — Gahryman Arkadagymyz Gurbanguly Berdimuhamedowyň mähriban käbesi Ogulabat ejäniň işläp bejeren kürtesi, öz elleri bilen ören ýüň joraby, mähriban Enäniň on barmagynyň hünärinden dörän alajalary we alaja örülýän guraly talyp gyzlarda uly täsir galdyrdy.
1971-nji ýylda Ogulabat eje tarapyndan keşdelenen ajaýyp kürte «gyýak», «okgözi», «içýan agyz», «tazy guýruk» nagyşlary bilen bezelipdir. Aragerbisi alaja düýe ýüň bilen örülip, kürtäniň merkezinden çatylypdyr. Ýakasynyň sag tarapynda «1971 ýyl» diýen iňňe bilen ýerine ýetirilen ýazgy köjeme usulynda tikilipdir.
Türkmen halkynyň milli mirasy, zenanlarymyzyň ajaýyp el işleri bilen ýaýbaňlandyrylan kaşaň muzeý ýaşlarda ýatdan çykmajak täsir galdyrdy. Gezelenje gatnaşyjylar kümüş saçly enelerimizi, baýdak boýly gyz-gelinlerimizi maşgalanyň sütüni, ahlak gözelliginiň nusgasy hökmünde mukaddes Tugumyzyň derejesinde hormatlaýan, milli medeniýetimizi dünýä möçberinde dabaralandyrýan, ýurdumyzy rowaçlyklaryň täze belentliklerine ynamly alyp barýan Gahryman Arkadagymyza, Arkadagly Serdarymyza tüýs ýürekden çykýan alkyş sözlerini aýtdylar.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.