Yhlasyň ýagşy myrady
«Halkyň Arkadagly zamanasy» diýlip atlandyrylan üstümizdäki 2022-nji ýyl meniň ömrümde ýatdan çykmajak bagtly pursatlara baý boldy. Şol pursatlaryň iň naýbaşysy-da Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň Halkara ykdysadyýeti hünäriniň I ýyl talyby bolmagymdyr.Köplenç, aýgytly hem täsirli pursatlar bizi kämillige atarýar. Muňa mysal hökmünde bolsa, 2022-nji ýylda Ýaş diplomatlar mekdebiniň guramagynda Türkmenistanyň Daşary işler ministrliginiň Halkara gatnaşyklary institutynda geçirilen «Parahatçylygyň ýaş çaparlary» atly akyl-paýhas bäsleşiginiň 1-nji möwsüminiň Baş baýragyna eýe boldum. Bu bäsleşikde men diňe Baş baýraga eýe bolmak bilen çäklenmän, eýsem institutyň halypa mugallymlarynyň özümizi tapmagymyz, kämil şahsyýetler bolup ýetişmegimiz ugrunda beren öwüt-ündewlerini diňlemek bilen ählitaraplaýyn kämilleşdim. Üstesine bu bäsleşik maňa ýene-de bir zady — geljekde saýlap aljak, şol ugurdan zähmet çekjek kärimi tapmaga kömek etdi.
Nesip bolsa, geljekde men ýokary okuw mekdebini tamamlap, özümiň höwes edýän asylly kärimiň eýesi bolup, at-owazasy ýedi yklyma dolan Watanymyzyň ösüşine mynasyp goşant goşaryn. Arkadagly Serdarymyz Gahryman Arkadagymyzyň amala aşyran durmuş syýasatyny üstünlikli dowam edip, biz — ýaşlaryň uçursyz zehinli nesiller bolup ýetişmegimiziň ugrunda irginsiz zähmet çekýär. Arkadagly Serdarymyzyň: «Watan diňe halky bilen Watandyr» diýýän sözlerinden ugur alyp, Watan bilen bir jan, bir ten boljakdygymyza, türkmen diplomatiýasynyň milli mekdebiniň tejribeli mugallymlaryndan alan bilimlerimizi ýerlikli peýdalanyp, ilhalar ynsanlar, kämil halkaraçy hünärmenler bolup ýetişjekdigimize tüýs ýürekden ynandyrýaryn.
Biz – ýaşlara okamaga, öwrenmäge giň mümkinçilikleri döredip berýän Gahryman Arkadagymyzyň, Arkadagly Serdarymyzyň janlary sag, belent başlary aman bolsun!
Ýagşymyrat ÖWEZOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
Halkara ykdysadyýeti hünäriniň I ýyl talyby.