Ýaýlymlarda ýaňlanýan çagalaryň jykyrdysy
Ynsan durmuşy bilen ýakyn aragatnaşyk saklaýan teleradioýaýlymlary çagalaryň dünýäsine hem öz täsirini ýetirýär. Kiçijek çagajyklar telewizorda görkezilýän multifilimlere tomaşa edip, dil baýlygyny ösdürýär, täze dilleri öwrenip bilýär. Mundan başga-da olaryň hereketlerini öwrenýärler we gaýtalaýarlar. Şeýlelikde telewideniýe çagalaryň dünýäsinde uly ähmýete eýe bolýar.
Häzirki wagtda dünýäde her ýylyň mart aýynyň birinji ýekşenbesinde bellenip geçilýän “Halkara çagalar telewideniýesi we radio ýaýlymlar güni” Birleşen Milletler Guramasynyň Çagalar Gaznasy tarapyndan 1994-nji ýylda döredildi. Dünýäniň ýüzden gowrak ülkesinde bellenlip geçilýän bu sene munasybetli radio we telewideniýelerde ýörite çagalar üçin niýetlelen filimler, multifilimler, gepleşikler ýaýlyma goýberilýär. Çagalar tarapyndan söýülip tomaşa edilýän dünýä ýüzünde meşhurlyga eýe bolan “Nickelodeon”, “Cartoon Network”, “Disney Channel”, “Disney XD”, “PBS Kids”, “Disney Junior”, “Baby TV”, “Family TV” ýaýlymlary ýatlasak ýerlikli bolar.
Garaşsyzlygymyzy gazananymyzdan soň ösüşiň belent sepgitlerine ýeten ýurdumyzda ýaş nesillerimiziň ylymly-bilimli bolup ýetişmekleri ugrynda köp işler alnyp barylýar. Ýurdumyzyň Milli teleýaýlymlarynyň biri bolan “Ýaşlyk” ýaýlymy ülkämiziň ähli künjeginde elýeterli bolup, onda körpejelerimiz, ýetginjeklerimiz üçin niýetlenen gyzykly gepleşikler ýaýlyma berilýär. Şol gepleşikleriň biri hem körpelerimiziň sabyrsyzlyk bilen garaşyp tomaşa edýän “Siziň üçin körpeler” gepleşigidir. Gepleşigiň dowamynda ýurdumyzyň dürli künjeginden gelen körpelerimiz öz başarnyklaryny görkezip goşgudyr, aýdymlar bilen çykyş edýärler. Şeýle gepleşikler netijesinde çagalarymyzda gowy täsirler galýar we olaryň maksadaokgunlylyklaryny has-da güýçlendirýär.
Laçyn RAHMANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.