«Ýaşlaryň hünär işinde liderlik» atly okuw maslahaty geçirildi
2023-nji ýylyň 27-nji maýynda Türkmenistanyň Daşary işler ministrliginiň Halkara gatnaşyklary institutynda Dünýä dilleri kafedrasynyň gurnamagynda «Ýaşlaryň hünär işinde liderlik» atly okuw maslahaty geçirildi. Oňa kafedranyň mugallymlary, «Lingvo World» gurnagynyň we «Let’s speak up!» dil gurnaklarynyň agzalary gatnaşdy.
Okuw maslahatynyň dowamynda mugallymlar saýlan hünär ugrunda ýaşlaryň liderlik häsiýetlerini we ukyplaryny ösdürmäge, şeýle hem, olary talyplyk ýyllaryndan jemgyýetçilik we guramaçylyk işlerine çekmäge bagyşlanan çykyşlary etdiler. Soňra liderlik ugrunda öňdebaryjy amerikaly bilermen we tälimçi, köpsanly kitaplaryň we seminarlaryň awtory Jon Makswelliň kitaby esasynda taýýarlanan «Lideriň 21 sany hökmany häsiýeti» atly wideoýazgy görkezildi.
Okuw maslahatynyň ahyrynda gatnaşyjylara liderlik ukyplaryny anyklamak üçin test sowalnamalaryna jogap bermek hödürlenildi. Talyplar testiň netijeleri bilen tanyşyp, deň-duşlary we mugallymlar bilen özara pikir alyşdylar.
Tylla BABAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy