Ýaşlary watansöýüjilik ruhunda terbiýelemek bilen bagly wagyz-nesihat duşuşygy geçirildi
2024-nji ýylyň “Pähim-paýhas ummany Magtymguly Pyragy” ýyly diýlip atlandyrylmagy bilen türkmen halkynyň Milli Lideri Gahryman Arkadagymyzyň öwüt-ündewleri esasynda ýurdumyzda ýaşlaryň sazlaşykly ösüşi, olaryň jemgyýetimizde eýeleýän ornuny pugtalandyrmak boýunça birnäçe işler alnyp barylýar.
Şol nukdaýnazardan ugur alyp, 2024-nji ýylyň 22-nji fewralynda Türkmenistanyň Daşary işler ministrliginiň Halkara gatnaşyklary institutynda Gündogaryň beýik akyldary Magtymguly Pyragynyň goşgularyndaky terbiýeçilik ähmiýetli öwüt-nesihatlaryny, millilik, däp-dessurymyz we edep-terbiýe kadalaryny, sagdyn durmuş ýörelgelerini, maşgala gymmatlygyny terbiýelemek we ony giňden wagyz etmek maksady bilen Türkmenistanyň jemgyýetçilik guramalarynyň, saglygy goraýyş we hukuk goraýjy edaralarynyň wekilleriniň gatnaşmagynda wagyz-nesihat duşuşygy geçirildi.
Duşuşyga, Türkmenistanyň Magtymguly adyndaky Ýaşlar guramasynyň Merkezi Geňeşiniň başlygynyň orunbasary D.Durdymuhammedow, Türkmenistanyň Içeri işler ministrliginiň Metbugat merkeziniň bölüm müdiri, polisiýanyň podpolkownigi T.Abdullaýew, Türkmenistanyň Senagatçylar we telekeçiler partiýasynyň Aşgabat şäher komitetiniň ýanyndaky ýaş telekeçiler merkeziniň başlygy S.Aşyrow, Türkmenistanyň Kärdeşler Arkalaşyklarynyň Milli merkeziniň döwlet edaralarynyň işgärleriniň kärdeşler arkalaşygy boýunça utgaşdyryjysy, Geňeşiň başlygy M.Gullyýew, Türkmenistanyň Agrar partiýasynyň Aşgabat şäher komitetiniň baş hünärmeni Ý.Ýazgylyjow, Türkmenistanyň Saglygy goraýyş we derman senagaty ministrliginiň Aşgabat şäher saglygy goraýyş müdirliginiň 8-nji saglyk öýüniň lukmany N.Kömekowa, Halkara gatnaşyklary institutynyň ilkinji Ýaşlar guramasynyň başlygy, Halkara hukugy we deňeşdirme hukuk öwreniş kafedrasynyň öwreniji mugallymy B.Gurbandurdyýew, şeýle hem institutyň talyplary gatnaşdylar.
Duşuşygyň dowamynda çykyş edenler Gahryman Arkadagymyzyň kitaplaryndaky we Magtymguly Pyragynyň goşgy setirlerindäki edep-terbiýe baradaky gymmatly ündewlerini bize ýetirdiler. Myhmanlaryň wagyz eden gymmatly ündewleri talyp ýaşlaryň dünýägaraýşyny has-da artdyrdy.
Aknabat DURDYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.