Ýaş terjimeçileriň döredijilik bäsleşigi
2025-nji ýylyň 11-nji fewralynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Magtymguly adyndaky Ýaşlar guramasynyň Aşgabat şäher geňeşiniň, «Dünýä edebiýaty» žurnalynyň redaksiýasynyň hem-de institutymyzyň bilelikde guramagynda ýokary okuw mekdepleriniň talyplarynyň arasynda Türkmenistanyň diplomatik işgärleriniň güni mynasybetli yglan edilen «Dünýä dilleri ― dost-doganlyk köprüsi» atly döredijilik bäsleşiginiň ýeňijilerini sylaglamak dabarasy geçirildi.
Degişli şertlere laýyklykda, ýurdumyzyň ýokary okuw mekdeplerinde bilim alýan talyplar dünýä meşhur ýazyjy-şahyrlaryň kyssa eserlerinden, poema ýa-da goşgularyndan bir parçany türkmen diline terjime edip, bäsleşige hödürlediler. Döredijilik bäsleşigine ýaş terjimeçileriň 100-den gowragy gatnaşyp, olar iňlis, rus, arap, koreý, nemes, italýan, türk edebiýatyndan parçalary türkmen diline terjime etdiler. Munuň özi ýaş nesilleriň dünýä edebiýatyna, şol sanda daşary ýurt dillerine bolan höwesleriniň uludygyny görkezýär.
Bäsleşige hödürlenen eserleriň hiline, terjimeçilik ussatlygyna we mazmunyna baha berlip, eminler topary tarapyndan ýeňijiler kesgitlenildi. Şeýlelikde, ýaş terjimeçileriň 30-sy döredijilik bäsleşiginiň ýeňijileri boldular. Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň talyplary Gunça Hamedowa, Ogulnar Orazmyradowa, Nurgeldi Ataýew, Halkara gatnaşyklary fakultetiniň talyplary Aýlar Nedirowa, Şyhdurdy Şyhyýew, Ýazjeren Tirkişowa, şeýle hem Halkara hukugy fakultetiniň talyby Kadyrmyrat Öwezgylyjow bäsleşikde ýeňiş gazandylar. Ýeňijilere guramaçylar tarapyndan Hormat hatlary hem-de gymmat bahaly sowgatlar gowşuryldy.
Ýokary okuw mekdeplerinde okaýan talyplaryň arasynda şeýle döredijilik bäsleşikleriniň geçirilmegi terjimeçilik sungatyny ösdürmäge, ýaşlaryň dil baýlygyny hem-de daşary ýurt dillerine bolan höwesini ýokarlandyrmaga, olaryň dil sowatlylygyny, dünýä edebiýatyna bolan gyzyklanmalaryny artdyrmaga ýardam edýär.
Göwher TAHYROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.