Wysal bolan arzuw
Ilki bilen, Gahryman Arkadagymyza, Arkadagly Serdarymyza ýaş ýüregimden çykýan çäksiz sagbolsunymy aýtmak isleýärin. Çünki Gahryman Arkadagymyz tarapyndan başy başlanan, Arkadagly Serdarymyz tarapyndan dowamat dowam tapýan bagtyýar döwrümizde maňa özümiň iň uly arzuwymyň wysalyna ýetmek — Türkmenistanyň Daşary işler ministrliginiň Halkara gatnaşyklary institutynyň talyby bolmak bagty miýesser etdi.
Men kiçiligimden bäri bilim dünýäsinde üzňe bolman, kitaby iň ýakyn dost tutunyp, ürç edip okamagy halaýardym. Başlangyç synplarda geçirilýän dürli bäsleşiklerde işjeň çykyş edip, öňdäki orunlara mynasyp bolmak özüme bolan ynamy berkidipdi. Çagalar üçin niýetlenen «Güneş» žurnalynda özümiň goşgularym, hekaýalarym we terjimelerim bilen yzygiderli çykyş edip durýardym. Kitap dünýäsine içgin aralaşmagym, bilime bolan teşneligim maňa her ýylda mekdep okuwçylarynyň arasynda geçirilýän «Altyn asyryň altyn zehinleri» atly bäsleşigiň şäher tapgyrlarynda üstünlik gazanmagyma uly ýardam berdi. Türkmenistanyň Magtymguly adyndaky Ýaşlar Guramasynyň Mary welaýat Geňeşiniň «Altyn Göreç» okuw merkezi bilen bilelikde guran «Zehin Bäsleşigi» bäsleşiginde II orundan paýly boldum. Mundan başga-da, halkara internet olimpiadalarydyr taslama bäsleşiklerinde baýrakly orunlara mynasyp bolmak meniň bilim dünýäsine bolan höwesimi has-da artdyrdy. Dünýä dillerini has çuň öwrenmek maksady bilen, ýurdumyzda hereket etýän okuw merkezlerinde goşmaça bilim aldym. Wagt tapdygym Gahryman Arkadagymyzyň ak patasy bilen açylyp, halkymyzyň hyzmatynda bolan kitaphanalarda Gahryman Arkadagymyzyň kämil paýhasyndan syzylyp çykan dürdäne kitaplaryny ürç edip okaýardym. Şeýlelikde ýurdumyzyň dünýä ýüzünde abraýyny has-da belende götermek maksady bilen, diplomat bolmak arzuwyny ýüregime düwdüm. Ynha, bu gün Berkarar döwletimiziň täze eýýamynyň Galkynyşy döwrüniň «Halkyň Arkadagly zamanasy» diýlip atlandyrylan ýylda bu arzuwymyň wysal tapmagyna ýardam etjek mukaddes bilim ojagynyň talyby boldum. Nesip bolsa, geljekde ata Watanymyzyň halkara giňişligindäki abraýyny mynasyp goramak üçin kämil halkaraçy hünärmen bolup ýetişmek ugrunda yhlasymy gaýgyrmaryn.
Berdigylyç ÝAZMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.