Wenada žurnalistika bilen bagly ýörite okuw sapaklary geçirildi
2024-nji ýylyň 21-22-nji noýabrynda Awstriýa Respublikasynyň Wena şäherinde ýerleşýän Ýewropada Howpsuzlyk we Hyzmatdaşlyk Guramasynyň merkezi edarasynda žurnalistika hem-de maglumat dünýäsi bilen bagly ýörite okuw sapaklary geçirildi. Oňa ýurdumyzdan Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň talyby Annaberdi Kaşaňow hem gatnaşdy.
Okuw sapaklarynyň dowamynda häzirki zaman dünýäsinde žurnalistikanyň eýeleýän orny dogrusynda gürrüň edildi. Sapaklaryň barşynda çykyş edenler maglumatlary seljermek, olary anyklamak babatda täze çemeleşmeleri öňe sürdiler.
Ählumumy abadançylygy berkitmekde maglumatlar torunyň täsiri uly bolup durýar. Şonuň üçin hem şeýle okuw sapaklarynyň geçirilmegi žurnalistleriň hünär kämilligini ýokarlandyrmaga ýakyndan ýardam edýär.
Aýratyn belläp geçsek, Türkmenistan bilen ÝHHG-nyň arasynda syýasy, ykdysady we ynsanperwer ugurlarda uzak möhletleýin ýokary derejeli hyzmatdaşlyk ýola goýlandyr. Ýurdumyz bilen bu abraýly gurama sebit, dünýä ähmiýetli birnäçe maksatnamalary durmuşa geçirýär. Şunda Türkmenistanyň sebitleýin howpsuzlygy we durnukly ösüşi pugtalandyrmakda eýeleýän ornunyň ýokarydygyny görmek bolýar. Döwletimiz mundan beýläk-de Ýewropada Howpsuzlyk we Hyzmatdaşlyk Guramasy bilen bilelikde alyp barýan işleriniň gerimini giňeltmegi meýilleşdirýär. Çünki hormatly Prezidentimiziň belleýşi ýaly, ýurdumyzyň abraýly halkara guramalar, şol sanda ÝHHG bilen gatnaşyklaryny hemmetaraplaýyn ösdürmek döwletimiziň daşary syýasatynyň ileri tutulýan ugurlarynyň biri bolup durýar.
Türkmen ýaşlarynyň ähli babatda kämil hünärmenler bolup ýetişmekleri ugrunda giň mümkinçilikleri döredip berýän, uly işleri durmuşa geçirýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun, tutýan tutumly işleri hemişe rowaçlyklara ýar bolsun!
Muhammetmurat NARMEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.