«MERKEZI AZIÝA – KOREÝA» HYZMATDAŞLYK FORUMYNYŇ SEKRETARIATY BILEN GEÇIRILEN DUŞUŞYK
2023-nji ýylyň 31-nji oktýabrynda paýtagtymyzyň «Ýyldyz» myhmanhanasynda Türkmenistanyň Daşary işler ministrliginiň Halkara gatnaşyklary instituty bilen «Merkezi Aziýa – Koreýa» hyzmatdaşlyk forumynyň arasynda duşuşyk geçirildi. Duşuşyga Türkmenistanyň Daşary işler ministrliginiň Halkara gatnaşyklary institutynyň rektory J.Gurbangeldiýew we «Merkezi Aziýa – Koreýa» hyzmatdaşlyk forumynyň ýerine ýetiriji direktory Li Joň Kuk gatnaşdylar. Bu duşuşygyň paýtagtymyz Aşgabatda geçiriljek XVI «Merkezi Aziýa – Koreýa» hyzmatdaşlyk forumynyň öňüsyrasynda geçirilmegi aýratyn bellenilmäge mynasypdyr.
Duşuşygyň başynda taraplar özara alnyp barylýan işler bilen tanyşdylar. Şeýle hem, çäräniň dowamynda geljekki maslahatlary bilelikde gurnamak, ylmy makalalary, okuw kitaplaryny we okuw gollanmalaryny, ylmy gözleg maksatnamalaryny özara alyş-çalyş etmek, şeýle hem, geljekki ylmy maslahatlary gurnamak babatda özara çakylyklary alyşmagy guramak, ylym-bilim babatda alnyp barylýan işlerde hyzmatdaşlygy mundan beýläk-de ösdürmek babatda meseleler ara alnyp maslahatlaşyldy.
Duşuşygyň ahyrynda taraplar bu çäräniň özara ylym-bilim ugurda hyzmatdaşlygy has-da giňeltmekde uly ýardam etjekdigine ynam bildirdiler.
Merdan BERDINYÝAZOW,
Türkmenistanyň Daşary işler ministrliginiň
Halkara gatnaşyklary institutynyň
uly mugallymy.